Jambylda 200-ge jýyq esirtki qylmysy anyqtaldy
03:40, 20 Sáýir 2021
TARAZ. QazAqparat – Jambyldyq polıtseıler esirtki qylmysyna qarsy belsendi kúres júrgizýde, dep habarlaıdy QazAqparat tilshisi.
Aǵymdaǵy jyldyń birinshi toqsanynyń qorytyndysy boıynsha Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń qyzmetkerleri 196 esirtki qylmysy anyqtady. Onyń ishinde, esirtki ótkizýdiń 39, asa iri mólsherde saqtaýdyń 19, esirtki quraldarynyń kontrabandasynyń 4, quramynda esirtki zaty bar ósimdikterdi ósirýdiń 1, qylmystyq teris qylyqtardyń 133 deregi belgili boldy.
«Zańsyz aınalymnan 114 keli túrli esirtki quraldary, onyń ishinde 40 keli marıhýana, 73 keliden astam gashısh, 570 gramnan astam geroın jáne 10 gramm sıntetıkalyq esirtki quraldary alyndy», - dep qorytyndylady Jambyl oblysynyń PD Esirtki qylmysyna qarsy is-qımyl basqarmasy bastyǵynyń orynbasary, polıtsııa maıory Dinmuhambet Qoıtorıev.