Jambylda 16,5 myń adam 42 500 teńgelik áleýmettik tólemaqy alǵan
Bul týraly óńirlik kommýnıkatsııalar qyzmeti alańynda ótken baspasóz máslıhatynda oblys ákimdiginiń jumyspen qamtýdy úılestirý jáne áleýmettik baǵdarlamalar basqarmasynyń basshysy Tımýrjan Nurymbetov aıtyp berdi,- dep habarlaıdy QazAqparat.
Qazirgi tańda áleýmettik tólemderdi alýǵa ótinish berý úshin 42500.enbek.kz saıty jáne @JambylObl42500Bot. telegramm-boty jumys istep turǵanyn eske salǵan basqarma basshysy ataýly áleýmettik kómek aıasynda azyq-túlikke 5 647 teńge mólsherinde járdemaqy tóleý maqsatynda 6 jastan 18 jasqa deıingi balalardyń tizimi naqtylanǵanyn da jetkizdi.
- Bul tizimge ataýly áleýmettik kómek alýshylardyń otbasylarynan 19 145 bala engen. Olarǵa Taraz qalasynyń jáne barlyq aýdandardyń jumyspen qamtý bólimderinen 108 mln teńge tólendi, - dedi Tımýrjan Bıdaıbekuly.
Spıkerdiń aıtýynsha, elimizde tótenshe jaǵdaı rejımi jarııalanýyna baılanysty 2 AEK-ten tómen emes mólsherdegi azyq-túlik pen turmystyq jıyntyq quramyn úlestirý nemese shottaryna aqshalaı qarajatty aýdarý úshin birneshe sanat boıynsha tizim jasaqtalypty. Onyń alǵashqysy, ataýly áleýmettik kómek alatyn otbasylardyń 6 jastan 18 jasqa deıingi 19 129 balasy. Ekinshisi, birinshi, ekinshi, úshinshi toptaǵy barlyq múgedekter, bala jasynan múgedek nemese múmkindigi shekteýli balalardyń kútimimen otyrǵan ata-analar – 46 000 adam. Kelesisi, resmı tirkelgen jumyssyzdar, sany 12 000 azamat eken.
- Óńirde atalǵan azyq-túlik jıyntyǵymen barlyǵy 77 130 adam qamtylatyn bolady. Bir jıyntyq úshin qarjylandyrý mólsheri 5 567 teńgeni quraıdy. Al barlyǵy – 1 288,1 mln. teńge. Bul somanyń 1261,1 mln teńgesi respýblıkalyq bıýdjetten bólinbek, - dep atap ótti basqarma basshysy.
Aıta keteıik, sonymen qatar «Nur Otan» partııasy Jambyl oblystyq fılıaly «BizBirgemiz» qorynyń qarajatynan Taraz qalasy boıynsha halyqtyń áleýmettik osal toptary qataryndaǵy 7 473 adamǵa 50 myń teńge kóleminde kómek berý jumystaryn júrgizilýde,-dedi basqarma basshysy.