Jambylda 12 adamnyń tirkeýsiz ári qujatsyz júrgeni belgili boldy
1 qazannan 1 qarashaǵa deıingi aralyqta Jambyl oblysynyń aýmaǵynda ózekti máselelerdi zerdeleý, quqyq buzýshylyqtardy eskertý jáne aldyn alý maqsatynda ákimshilik ýchaske turǵyndaryn barynsha qamtýǵa baǵyttalǵan «Ýchaske» jedel aldyn alý is-sharasy ótkizilýde.
«Jedel aldyn alý is-sharasy bastalǵannan beri polıtsııa qyzmetkerleri 1137 adamdy, onyń ishinde Qazaqstan Respýblıkasynda tirkeýsiz nemese jeke basyn kýálandyratyn qujattarsyz turý erejelerin buzǵany úshin 12 adamdy ákimshilik jaýapkershilikke tartty. Tekserý jumystary barysynda belgili bir turǵylyqty jeri joq 4 azamat Taraz qalasy Polıtsııa basqarmasynyń arnaıy qabyldaý mekemesine jiberildi. Sondaı-aq, tekserýmen 249 atys qarýynyń ıeleri qamtyldy, nátıjesinde tirkelmegen eki atys qarýy anyqtalyp, tárkilendi. Sonymen qatar, ishki ister organdaryna túrli quqyq buzýshylyqtar jasaǵany úshin 67 kámeletke tolmaǵan jasóspirim jetkizildi, onyń ishinde 3 jasóspirim ýaqytsha beıimdeý ortalyǵyna ornalastyryldy», – dep habarlady Jambyl oblysynyń PD Jergilikti polıtsııa qyzmeti basqarmasynyń bastyǵy Serik Áldıbekov.
Sonymen qatar polıtseıler saıajaı alqaptaryn, qaraýsyz qalǵan jáne qurylysy toqtatylǵan ǵımarattardy, sondaı-aq úı shatyrlary jáne jertóle jaılaryn tekseredi. Іs-sharalar bastalǵannan beri ýchaskelik polıtsııa ınspektorlary bekitilgen ákimshilik ýchaskelerde 6 myńnan astam páterdi jáne aýlalardy aralap, turǵyndarmen tanysyp, ýchaskelik ınspektorlardy turǵyndardyń aýlalyq chattaryna qosý úshin myńnan astam vızıtkalar taratty.
Sondaı-aq, eshbir qujatsyz jalǵa berilgen 20-ǵa jýyq páter anyqtaldy. Osy derek boıynsha aqparat Jambyl oblysy boıynsha Memlekettik kirister departamentine joldandy. Jalǵa beriletin páter ıelerimen túsindirý jumystary júrgizildi, bazarlar men basqa da saýda oryndaryn, qolaısyz otbasylardy, qoǵamǵa jat áreketter men qaraýsyz qalý derekteriniń jolyn kesý úshin jastar men kámeletke tolmaǵandardyń shoǵyrlaný oryndaryn, sondaı-aq azamattyq qarý ıeleri men sheteldik azamattardy tekserý jumystary júzege asyryldy.