Jambylda 11 aýyldyń turǵyndary 100 paıyzǵa ekpe alǵan

TARAZ. QazAqparat – Jambyl oblysynda 11 aýyldyq okrýgtiń turǵyndary koronavırýsqa qarsy vaktsına alý josparyn 100 paıyzǵa oryndaǵan, dep habarlaıdy QazAqparat tilshisi.

Jambyl oblysy Qordaı aýdanyndaǵy Jańaturmys, Gvardeıskıı, Muzbel jáne Sulýtór aýyldarynyń, Moıynqum aýdanynyń Aqbaqaı jáne Qyzylotaý, Jambyl aýdanynyń Asa jáne Órnek, Talas aýdanynyń Berikqara, Kóktal, Tamdy aýyldarynyń turǵyndary KVI-ge qarsy vaktsına alý boıynsha jospardy 100 paıyzǵa oryndaǵan.

Aýyldyqtardyń ekpe qabyldaýǵa jatatyn bóligi tolyǵymen vaktsınatsııalaýdan ótken.

Aıtalyq, Talas aýdanynyń Berikqara, Kóktal, Tamdy aýyldarynyń jospardaǵy turǵyndary túgeldeı ekpe alyp úlgergen.

Josparǵa sáıkes, atalǵan aýyldyq okrýgterdegi 1696 adam vaktsına alý kerek bolsa, ondaǵy 1735 turǵyn vaktsına saldyrǵan. Buǵan aýyldyqtardyń óziniń jáne jaqyndarynyń densaýlyǵyna beı-jaı qaramaýy, túsindirý jumystarynyń júıeli júrgendigi oń áser etken.

«100 paıyz ekpe alǵan aýyl turǵyndaryna alǵashynda túsindirme jumystary júrgizilip, jadynamalar taratylǵan. Eńbek esh ketpeı aýyl turǵyndarynyń vaktsına saldyrýǵa degen yntasy oıanyp, kópshilik arasynda oń pikir qalyptasty»,-delingen aýdan ákimdiginiń baspasóz qyzmetiniń habarlamasynda.