Jambyl jyrlary ulttyq deńgeıdegi uly isterge úndeıtin uranǵa aınalǵan - Dáýren Abaev
«Jambyl jyrlary – otansúıgishtikti oıatyp, ulttyq deńgeıdegi uly isterge úndeıtin uranǵa aınalǵan. Dala Gomeriniń otty jyrlary qıyn sátterde tek bizge ǵana emes, ózge de kóptegen halyqqa serpilis syılady. Onyń «Lenıngradtyq, órenim!» óleńi ekinshi dúnıejúzilik soǵystyń beıresmı ánurany desek, artyq aıtqandyq emes. Fashıstik basqynshylarmen kúresen árbir jaýynger óleń joldaryn júreginde saqtady. Jyr alyby qazaqtyń asqaq rýhy men erlik dańqyn álemge áıgilep, HH ǵasyrdaǵy asa aýyr synaqtardan eńsesi túsken týǵan halqyna úmit berdi. Sol úmit atalarymyz ben ákelerimizdi jeńiske jeteledi, ultymyzdy egemendikke bastady», - dedi Prezıdent Ákimshiligi basshysynyń birinshi orynbasary.
Dáýren Abaevtyń atap ótýinshe, Jambyl jyrlary jalpy adamzatqa ortaq qundylyqtarmen úndesip, álemdik mádenıettiń ajyramas bóligine aınalǵan. Óleńderi 50 tilge aýdarylyp, álemdik ádebıettiń altyn qoryna qomaqty úles qosty.
«Onyń jyr-dastandary adamzat tarıhyndaǵy tanymal aqyl-oı ıeleriniń tanym-túsinigimen tamyrlas. Jambyldyń rýhanı muralary áli de bolsa qazaqy túsinik turǵysynan tereń boılap, egemen eldiń kózimen qaraýdy, jan-jaqty baǵa berýdi qajet etedi. Azat kózqarastyń bir tarmaǵyna aqynǵa syrtynan tańylǵan óleńder men sózderdi anyqtap, olardy saralaý jumystary da jatady. Bul – otandyq jambyltaný salasynyń aldynda turǵan úlken mindettiń biri», - dedi ol.