Jambyl oblysynyń turǵyny baqshasynda qarasora ósirgen

TARAZ. QazAqparat - Jambyl oblysy Jambyl aýdanyndaǵy turǵyn úı aýlasynan polıtseıler jalpy salmaǵy 3 keli 520 gramm bolatyn ósirýge tyıym salynǵan 41 dana ósimdik tapty, dep habarlaıdy QazAqparat tilshisi.

Ustalǵan adam Shyǵys Qazaqstan oblysynyń týmasy. Jambyl oblysyna áleýmettik jeli arqyly tanysqan áıel úshin kóship kelgen.

Onyń aıtýynsha, qarasorany ósken soń keptirip, ózi tutyný úshin tuqymyn ekken.

«Buryn esirtki satqany úshin sottalǵan kúdikti óz kinásin tolyq moıyndady. Qazirgi ýaqytta atalǵan derek boıynsha Qazaqstan Respýblıkasy Qylmystyq Kodeksiniń 300-baby 1-bóligimen, ıaǵnı, ósirýge tyıym salynǵan ósimdikterdi egý, ósirý nemese qarasora, kóknár, quramynda esirtki zattary bar basqa da ósimdikterdiń sorttaryn ósirý boıynsha sotqa deıingi tergeý amaldary bastaldy», – dep habarlady oblystyq PD EQQІB bastyǵy polıtsııa podpolkovnıgi Álim Bajyqbaev.

Polıtsııa podpolkovnıginiń aıtýynsha, kúdiktige qatysty eki myń aılyq eseptik kórsetkishke deıingi mólsherde aıyppul salynady ne sol mólsherde túzeý jumystary júrgiziledi. Bolmasa alty júz saǵatqa deıingi merzimge qoǵamdyq jumystarǵa tartylady, ne eki jylǵa deıingi merzimge bas bostandyǵyn shekteıdi, ne sol merzimge bas bostandyǵynan aıyrylady.

Aıta keteıik, aımaqta Jambyl oblysy polıtsııa departamenti esirtki qylmysyna qarsy is-qımyl basqarmasynyń «Qarasora-2023» jedel-profılaktıkalyq is-sharasy ótip jatyr.

Buǵan deıin Jambyl oblysynda asa iri mólsherde esirtki saqtaǵan turǵyn ustalǵanyn habarlaǵan bolatynbyz.