Jambyl oblysynyń sý tasqyny kezeńine daıyndyǵy qandaı

TARAZ. QazAqparat – Jambyl oblysy aýmaǵymen ótetin Shý, Talas jáne Asa ózenderinde sý deńgeıiniń kóterilý, sondaı-aq taý bókterindegi erigen qar men jańbyr saldarynan sý basý qaýpi bar. Bul oraıda sý tasqynyna qarsy is-sharalar jospary aıasynda 142 kılometr drenaj jáne sýarý kanaldary tazartyldy, dep habarlaıdy QazAqparat.

Sonymen qatar, 185 kılometr aryq jelisi, temirjol jáne avtomobıl joldaryndaǵy 430 kópir jáne 1 790 sý ótkizý qurylǵylary retke keltirilip, 5 gıdrotehnıkalyq qurylys pen 19 retteýshi qurylǵy jóndelgen. Bul týraly óńirdegi Tótenshe jaǵdaılar departamentiniń basshysy Baǵdat Danılov aıtyp berdi.

«Óńirde tótenshe jaǵdaılarǵa oblystaǵy jergilikti atqarýshy organdardyń korynan 363,8 mıllıon teńge, shuǵyl shyǵyndarǵa 489,6 mılıon teńge qarjy bólindi. Sý tasqyny saldaryn joıýǵa qajetti 143 tonna janar-jaǵarmaı, 11 myń tonna ınertti materıaldar, 40 myń qap daıyndaldy. Sý tasqyny qaýpi bar 26 ýchaskede «Kóktem« respýblıkalyq komandalyq-shtabtyq oqý-jattyǵýy ótkizilip, azamattyq qorǵaýdyń kúshteri men quraldary kóktemgi tótenshe jaǵdaılarǵa áreket etýge daıyndyqqa keltirildi», - dep atap ótti Baǵdat Danılov.

Onyń sózinshe, jattyǵý barysynda halyqty qulaqtandyrý, qaýipsiz orynǵa kóshirý, apat aýmaǵyn tikushaqpen qutqarý, ushqyshsyz ushý apparatymen barlaý jasaý, apat aýmaǵynan adamdardy izdeý men qutqarý, olarǵa alǵashqy medıtsınalyq kómek kórsetý, sý basý aýmaǵynan alyp shyǵý jumystaryna daıyndyq pysyqtalǵan. Sý tasý saldarynyń aldyn alý jáne joıý úshin jumyldyrylatyn oblystyń azamattyq qorǵaý aýmaqtyq qurylymdarynyń kúshteri 4 971 adamdy qurasa, 697 birlik tehnıka, 22 júzý quraly jáne 112 motopompa saqadaı saı daıyn. Zardap shekkenderdi evakýatsııalaý jáne barlaý jasaý úshin «Qazáýequtqarý» aktsıonerlik qoǵamynyń bir tikushaǵy Taraz qalasyndaǵy áýejaıda kezekshilik rejıminde tur.

«Kóktemgi oryn alýy múmkin tótenshe jaǵdaı kezinde kóshirilgen turǵyndardy ýaqytsha ornalastyrýǵa mádenıet jáne bilim oshaqtarynda 41 qabyldaý pýnktteri, 70 palatka, 200 uıyqtaıtyn qap, 200 jınalmaly kereýet, 10 jylytý qondyrǵysy daıyndalyp, departamenttiń jedel áreket etetin qurylymdary tolyq daıyndyqqa keltirildi. Paıdalanatyn sý qoımalarynyń oblysaralyq jáne memleketaralyq mańyzy bar iri sý qoımalarynyń jumys rejımin baqylaýdy da júzege asyryp jatyrmyz. Máselen, Kırov sý qoımasyna tasqyn sýlardy qabyldaý maqsatynda 27 naýryzdan bastap sý tastaý kólemi sekýndyna 10 tekshe metrge kóbeıtiletin boldy», - deıdi departament basshysy.