Jambyl oblysynyń sharýalary egistik alqabyna dronmen tyńaıtqysh seýip júr

TARAZ. QazAqparat - Jambyl oblysy Jýaly aýdany Kúreńbel aýylynyń turǵyny Sáýlembek Kómekbaev egistik alqabyna dronmen tyńaıtqysh seýip júr. Aýylsharýashylyq maqsatynda qoldanylatyn qurylǵy Qytaıda qurastyrylǵan, dep habarlaıdy QazAqparat tilshisi.

Mundaı tehnıka Jambyl oblysynda alǵash ret qoldanylyp otyr. Jańa tehnologııa aldaǵy ýaqytta óz nátıjesin berip jatsa, oblys kóleminde engiziledi.

«Dronmen tyńaıtqysh sebý ádisin Jýaly aýdanyndaǵy sharýashylyq paıdalanyp otyr. Qytaıda jasalǵan ozyq tehnologııanyń naryqtaǵy baǵasy -8-14 mln teńge aralyǵynda. Bir saǵatta dronmen 20 gektar jerge tyńaıtqysh shashýǵa bolady. Ony arnaıy mamandar kelip úıretedi. Tıimdiligine kóz jetkizsek, oblys boıynsha qoldanysqa engizýge daıynbyz», – deıdi oblystyq aýyl sharýashylyǵy basqarmasynyń basshysy Nurbı Jigitekov.

Aıta keteıik, Jambyl oblysynyń sharýalary bıyl 770,4 myń gektarǵa aýyl sharýashylyǵy daqyldaryn otyrǵyzdy.

Ótken jylmen salystyrǵanda 14,4 myń gektarǵa ulǵaıǵan egis alqabynyń 216,3 myń gektaryna jazdyq masaqty dándi daqyl, 72,1 myń gektaryna maıly daqyl, 44,8 myń gektaryna kókónis, 18,8 myń gektaryna dándik júgeri ekti.

Al baqsha daqyldary 16,9 myń, kartop 11,8 myń, qant qyzylshasy 10,8 myń, bir jyldyq shóp 27,9 myń jáne kópjyldyq shóp 30,8 myń gektarǵa sebildi.

Buǵan deıin Jambyl oblysynda tórt túlikti asyldandyrý jumystary bastalatynyn habarlaǵan bolatynbyz.