Jambyl oblysynyń prokýrorlary maıdangerlerdi Jeńis kúnimen quttyqtady

TARAZ. QazAqparat - Ekinshi dúnıejúzilik soǵysta Jeńistiń 72 jyldyǵyn merekeleý qarsańynda  Jambyl oblysynyń prokýrorlary maıdangerlerge bardy, dep habarlady «QazAqparat» HAA tilshisi oblys prokýratýrasynyń baspasóz qyzmetine silteme jasap.

Jambyl oblysynyń prokýrory Ernat Sybanqulov Tarazda turatyn  96 jastaǵy ardager Qybyrbaı Ryspanbetovti Uly Jeńis kúnimen quttyqtady.

Qybyrbaı ata maıdanǵa 1942 jyly attanyp, 1945 jyly oraldy. Surapyl soǵystyń barlyq qasiretin kózimen kórdi, Lenıngradty qorǵady. 1 jáne 2 dárejeli UOS ordenderimen, «Lenıngradty qorǵaǵany úshin», «Germanııadaǵy jeńisi úshin» medaldarymen, basqa da nagradalarmen marapattaldy. Soǵystan oralǵan soń, aýyl sharýashylyǵy salasynda Otan ıgiligi úshin qyzmet etti. Maıdanger prokýrordyń kelgenine qatty qýanyp, alǵys sezimin bildirdi.

Ardagerge baǵaly syılyqtar tabystalyp, EKSPO -2017 kórmesine eki shaqyrtý bıleti berildi.

«Qybyrbaı ata, Astanaǵa baryp, kórmede kórsetiletin eldiń jetistigin óz kózińizben kórýge densaýlyǵyńyz jaraıdy dep oılaımyn, - dedi Ernat Sybanqulov. - Munda sizderdiń, ardagerlerdiń sińirgen eńbegi sheksiz. Sizderdiń urpaqqa qalap bergen irgetastaryńyzdyń arqasynda gúldený jolyna qadam basýdamyz».

Al Moıynqum aýdany prokýratýrasynyń qyzmetkerleri maıdanger Saǵash Ábdirovtiń úıine bardy, onyń soǵys jyldaryndaǵy erlikteri jaıly bildi.  Saǵash Ábdirov «Jeńis», UOS ordenderimen, «Kavkazdy qorǵaǵany úshin» medalimen jáne basqa da nagradalarmen marapattaldy. Soǵystan keıin bilim berý salasynda qyzmet etti. Ustaz, keıinnen mektep dırektory boldy. Shyǵanaq aýylynyń aýyldyq keńes, aqsaqaldar keńesiniń tóraǵasy boldy. Qazir otbasynda baqytty ǵumyr keshýde, 30 nemere, 33 shóberesi, bir shópshegi bar.

Oblys prokýrory ardagerler, olardyń jesirleri men tyl eńbekkerlerine turaqty qamqorlyq jasap otyrýdy tapsyrdy.