Jambyl oblysynyń Kóksaı shatqalynda etnoaýyl salynyp jatyr

TARAZ. QazAqparat – Jambyl oblysynda «Kóksaı» etnoaýyly salynady. Bul týraly óńirlik týrızmdi damytý jáne osy baǵytta kezdesip otyrǵan máselelerdi talqylaýǵa negizdelgen jıyn barysynda aıtyldy, dep habarlaıdy QazAqparat tilshisi.

Óńirde týrızm ındýstrııasyn damytý, ishki jáne kirmeli týrızmniń áleýetin arttyrý maqsatynda oblys ákiminiń orynbasary Almas Mádıev týrıstik kompanııalardyń jáne qonaq úılerdiń basshylarymen kezdesip, keńes ótkizdi.

Keńeske jınalǵandardy oı-pikirin ortaǵa salýǵa shaqyrǵan Almas Mádıev salany damytýǵa aıryqsha den qoıý kerektigin basa aıtty.

«Bul basqosýymyzdyń túpki maqsaty – jumys oryndaryn saqtap, isti ary qaraı qarqyndy jalǵastyrý. Árıne, pandemııanyń saldarynan karantın shekteýlerimen eshkim úıinen shyǵa almaı, týrızm salasyna edáýir qıyndyqtar ákelgeni belgili. Endi jumysty jandandyryp, bar múmkindikti paıdalanýymyz kerek. Jambyl oblysynyń týrızmde áleýeti mol. Óńirimizde 187 qonaq úı, 7 shıpajaı bar», -dedi A.Mádıev.

Kásibin ilgeriletýge kedergi bolyp turǵan máselelerin aıtyp, kómek suraǵan kásipkerler balalar týrızmin ilgeriletý qajettigin kóterdi. Ásirese, elimizdiń tarıhyn taný úshin barlyq bala kóne Tarazdy, tarıhı jádigerlerge baı Áýlıeata óńirin óz kózimen kórýi kerektigin alǵa tartty.

Sondaı-aq, osy basqosýda «Kóksaı» etnoaýylynyń jobasy tanystyryldy. Kóksaı shatqalynan demalys ornyn ashqaly otyrǵan qojalyq ókili Nurmuhammed Isakov osy oraıda atqarylyp jatqan jumystarǵa toqtaldy.

«Ózimizdiń jeke ınvestorlyq esebimizden ashqaly otyrǵan demalys orynyna kıiz úıler ornatyp qoıdyq. Sol sekildi birqatar jumystar júrgizildi. Karantın shekteýleri alynǵan ýaqytta demalýǵa aıyna 2 jarym myń adam keldi. Eger joba tolyǵymen júzege asqan jaǵdaıda 80-100 adamdy jumyspen qamtımyz. Ol jerde 2 qonaq úı jáne sport kesheni, saıajaılar bolady. Jyldyń tórt mezgilinde de jumys isteýdi kózdep, jazda basseındermen qatar, qysta shańǵy tebý, syrǵanaq alańyn da júzege asyrmaqpyz. Jaıaý serýenmen qosa, atpen serýen jasaýdy da uıymdastyramyz. Bizge endigi keregi - 18 shaqyrym jolǵa asfalt tósep, gaz júrgizip berse deımiz. Basqa ınfraqurylymnyń bárin ózimiz jasap jatyrmyz», -dedi N.Isakov.

Onyń aıtýynsha, bul joba týrısterge tek demalys uıymdastyryp berýmen shektelmeı, ulttyq bolmysymyzdy da aıshyqtamaq.