Jambyl oblysynyń áskerıleri Petropavl kóshelerine dezınfektsııa jasaıdy
SQO Qorǵanys isteri departamentiniń málimetinshe, Petropavlǵa «Ońtústik» óńirlik qolbasshylyǵynyń 50 sarbazy keldi. Jambyl oblysynda kelisim-shart boıynsha áskerı qyzmet atqaratyn olar elimizdiń soltústiginde dezınfektsııalyq jumystardy atqarýǵa kómektesedi.
«Áskerı qyzmetshiler eń aldymen basqarý formasy joq ıesiz kóp qabatty turǵyn úılerdiń kireberisterin, esik aldaryn zararsyzdandyrady. Mundaı baspanalar kóbine Jas órken, Bylǵary zaýyty, Jumysshy kentinde ornalasqan. Olar negizinen 2-3 qabatty ǵımarattar. Petropavldy 4 sektorǵa, al olardy yńǵaıly bolý úshin shaǵyn bólikterge bóldik. Áskerı qyzmetshiler qalanyń ortalyq kóshelerinde de eńbek etedi. Shaǵyn sáýlet eskertkishterin, balalar men sport alańdaryn da zararsyzdandyrady», - deıdi Petropavl qalalyq turǵyn úı qatynastary bóliminiń jetekshisi Erlan Qaıyrbekov.
Petropavlǵa kelgen áskerı qyzmetshiler Beskól aýylyndaǵy ınternatqa ornalastyryldy. Arnaıy kıim-keshekpen, zararsyzdandyratyn qural-jabdyq, preparattarmen tolyq qamtyldy. Kúndelikti 6 saǵattan artyq jumys isteıtin sarbazdar búgin Jambyl Jabaev kóshesindegi karantınge jabylǵan podezderdi, balalardyń oıyn alańy men aýlany dıahlor eritindisimen dezınfektsııalady.