Jambyl oblysynyń ákimi aýyzsý, gazben qamtýdy 3 jylda aıaqtaýdy tapsyrdy
Oblys ákimdiginde ótken basqosýda Energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaev aýyzsý, tabıǵı gazben qamtý, jylý-energetıkasy jáne turǵyn úı jóndeý baǵytynda 133 jobaǵa 38,0 mlrd teńge qarastyrylǵanyn aıtty. Bul ótken jylmen salystyrǵanda 39,2 paıyzǵa kóp.
Qazirgi tańda oblystaǵy 371 eldi mekende 1 150,1 myń adam turady. Onyń ishinde 4 qalada (Taraz, Qarataý, Jańatas, Shý) 460,3 myń adam, 367 aýyldyq eldi mekende 689,8 myń adam bar.
Ótken jyldyń qorytyndysymen ortalyqtandyrylǵan aýyzsýǵa qol jetkizý kórsetkishi qalalarda 91 paıyzdy (419 myń adam), aýyldyq eldi mekenderde 88,8 paıyzdy (612,2 myń adam) quraǵan.
Qalalar mańyndaǵy turǵyn alqaptar aldaǵy 4 jylda kezeń-kezeńimen sýmen qamtylmaq.
Budan bólek, bıyl ortalyqtandyrylǵan aýyzsýmen qamtylmaǵan 69 aýyldyń 33-ine qubyr tartý bastalyp, 25 aýylǵa jyl sońyna deıin sý beriletini josparlanǵan. Al qalǵan 8 aýyldyq eldi mekenniń jobasy 2023 jylǵa ótpeli. Sondaı-aq 2024 jylǵa 15 joba, 2025 jylǵa 21 jobany júzege asyrý kózdelgen.
«Biz negizgi jumystardy keıinge qaldyrmaı, 2022-2023 jyldary atqarý kerekpiz. Sondyqtan 15 jobanyń da qujattama jumystaryna búginnen kirisip, keler jylǵa daıyndaýǵa tıispiz. 2025 jylǵa jumystardyń eń az kólemin qaldyryp, tolyǵymen aıaqtaýǵa kúsh salý qajet», - degen oblys ákimi Nurjan Nurjigitov josparly jobalardy qaıta saralap, taldaýdy tapsyrdy.
Sonymen qatar, jıynda turǵyndardy tabıǵı gazben qamtý máselesine de aıryqsha nazar aýdaryldy.
Búginde oblystaǵy 371 eldi mekenniń 257-si (69,3%) nemese 1 018 myń adam (88,6%) tabıǵı gazben qamtamasyz etilgen. Halyq sany 200-den az aýyldardy qospaǵanda, 2025 jyly kórsetkish bul 100 paıyzǵa jetetin bolady.
«Biz bolashaǵy joq aýyldar degen uǵymǵa basqasha kózqaraspen qaraý kerekpiz. Halyq sany az dep gaz, sý tartyp, jol salmaıtyn bolsaq, ondaǵy turǵyndardy áleýmettik nysandarmen qamtymasaq, ol aýyldarǵa kim kóship barady? Aýyldardyń bolashaǵyn qoldan qıyndatpaıyq. Qajetti jaǵdaılardy jasaıtyn bolsaq, jastar da sonda turaqtaıdy. Osy turǵyda keshendi túrde oılanyp, esepteýler júrgizip, múmkindikterdi qarastyrý kerekpiz», - dedi Nurjan Nurjigitov.
Aımaq basshysy aýyldarǵa aýyzsý, gaz tartqanda qubyrlardy kóshelermen júrgizý jumystary aldaǵy jobalarda mindetti túrde qamtylý kerektigine basa nazar aýdartty.
Gaz tartylǵan aýyldardaǵy áleýmettik nysandardyń jylytý júıesin kógildir otynǵa kóshirý jumystary keıinge qalmaýy kerektigine kóńil bóldi.