Jambyl oblysynyń ákimi aýlalardy abattandyrý jumystarynyń sapasyn tekserdi
Alataý shaǵynaýdanynda «Jumyspen qamtýdyń jol kartasy-2020» baǵdarlamasy boıynsha 5 aýla abattandyrylýda. Ol jumystarmen «Enerdjı-Taraz» JShS aınalysýda.
Aýlalardy abattandyrý tolyq asfalttaý, kóshelerdi jaryqtandyrý, oryndyqtar men qoqys jáshikterin ornatýdy kózdeıdi. Sondaı-aq, balalar men sport alańqaılary salynyp, keńeıtilýde.
Berdibek Saparbaev eń aldymen merdiger kompanııa men Taraz qalasynyń ákimi Aıtqazy Qarabalaevqa qurylys jumystarynyń sapasyna aıryqsha nazar aýdarý kerektigin tapsyrdy.
Aımaq basshysy átkenshekter men qum alańqaılaryn, strıt-vorkaýt alańdaryn aralap kórdi.
«Biz balalardyń ashyq aýada erkin oınap, sportpen shuǵyldanýy úshin barlyq qolaıly jáne qaýipsiz jaǵdaıdy qamtamasyz etýimiz kerek. Merdigerler turǵyndardyń pikirine qulaq asyp, olardyń eskertýlerin qaperge alýy tıis», - dedi Berdibek Saparbaev.
Ol merdigerden jumys barysynda múgedektigi bar adamdardyń, qarttardyń jáne balalar arbalarynyń qozǵalysy úshin qolaıly jaǵdaılar jasalýyn talap etti.
Óńir ákimi turǵyndardy áńgimege tartyp, olardy úıleriniń mańaıyn kógaldandyrýmen aınalysýǵa, PIK quramyna ený úshin birigýge shaqyrdy.
Turǵyndar eki úıdiń aýlalaryn abattandyryp jatqan «NurInvestHoldıng» JShS jumysyna kóńilderi tolmaıtynyn jetkizdi. Olar jańa oryndyqtardyń qazirdiń ózinde synyp jatqanyn, eski átkenshekter men syrǵanaqtardyń boıaýsyz qalǵanyn, qurylys qoqystarynyń shashylyp jatqanyn aıtyp, shaǵymdandy. Berdibek Saparbaev barlyq olqylyqtar joıylyp, merdiger jaýapkershilikke tartylatynyna sendirdi.
Budan bólek, «Enerdjı-Taraz» JShS Astana shaǵynaýdanynda taǵy bes aýlany abattandyrý sharalaryn aıaqtap úlgergen. Ondaǵy aktqarylǵan jumystarǵa B.Saparbaev oń baǵasyn berse, turǵyndar tarapynan qurylysshylarǵa alǵys aıtyldy.
Buǵan deıin oblys ákimimen kezdesýde «Astana» shaǵynaýdanynyń turǵyndary fýtbol alańyn salyp berýdi, kóshelerdi jaryqtandyrýdy, shatyrly qoqys konteınerlerin ornatýdy jáne avtoturaqty keńeıtýdi suraǵan bolatyn. Barlyq ótinish eskerilgen. Buǵan qosa, kompanııa óz qarajaty esebinen taǵy bir kórshi aýlany abattandyrý boıynsha jumystar júrgizip, balalar men sport alańqaılaryn salyp bergen.
Aıta ketý kerek, oblys ortalyǵynda «Jumyspen qamtýdyń jol kartasy-2020» baǵdarlamasy aıasynda barlyǵy 163 aýlada abattandyrý jumystary júrgizilýde.