Jambyl oblysynyń ákimi áleýmettik jelige tirkeldi

TARAZ. QazAqparat - Facebook áleýmettik jelisinde Jambyl oblysynyń ákimi Asqar Myrzahmetovtiń jeke paraqshasy paıda boldy, dep habarlaıdy QazAqparat tilshisi óńir basshysynyń baspasóz qyzmetine silteme jasap.

«Óńirdiń damýy, onyń áleýmettik-ekonomıkalyq áleýetiniń nyǵaıýy biz ben sizdiń birlesken jumysymyzǵa tikeleı qatysty. Halyqtyń turmys jaǵdaıyn jaqsartýǵa arnalǵan sharalardyń tıimdiligin arttyrý, jaqsy nátıjeler kórsetý - ortaq mindetimiz. Sondyqtan, jergilikti atqarýshy organdar men halyq arasyndaǵy baılanysty nyǵaıtý úshin «Facebook» áleýmettik jelisinde meniń jeke paraqsham ashylyp otyr», - dep jazdy Asqar Myrzahmetov alǵashqy jazbasynda.

Jambyl oblysynyń ákimi áleýmettik jelide halyqpen baılanys ornatýǵa nıetti ekenin jetkizdi.

«Kıeli Áýlıeata jerine jumysqa kelgen kúnnen bastap turǵyndarmen jáne oblys ıntellıgentsııasymen tyǵyz iskerlik baılanys jasap kelemin. Birlesip kóptegen jumystar atqardyq. Alda bizdi jańa jobalar kútip tur. Pikir almasý alańyn tıimdi paıdalana otyryp, óz pikirlerińizben bólisip, áleýmettik jáne ekonomıkalyq máselelerdi sheshýge qatysty usynystaryńyzdy bildiresizder dep úmittenemin», - dep jazdy Jambyl oblysynyń ákimi.