Jambyl oblysynyń ákimdigi qymbat turmystyq tehnıkalarǵa ne úshin tapsyrys berdi

TARAZ. QazAqparat - Taraz qalalyq kásipkerlik bóliminiń basshysy Aıdyn Altaı saýda úıiniń birinen 700 myń teńge turatyn telefon alyp, aqshasyn qaıtarmaı qoıǵan, dep jazady QazAqparat tilshisi.

Dúkennen qolhat jazyp, qaryzǵa telefon alǵan sheneýnik onyń aqshasyn bir aıda óteýge ýáde bergen. Alaıda, sodan beri alty aı boıy satýshyny kúnde «erteń» dep, aldap kelgen. Baılanys úzip, telefon qońyraýyna jaýap bermegen soń, saýda dúkeniniń basshysy Taraz qalasy ákiminiń atyna aryzben shyqqan.

Al, qymbat smartfon kimge alynǵanyn bilmek bolyp, bólim basshysyna habarlasqanymyzda «Kimge alǵanymdy aıta almaımyn. Alý kerek boldy, aldym. Eki ortada men yńǵaısyz jaǵdaıda qaldym», - deı kele, telefonnyń qaryzyn tólep qutylǵanyn aıtty. Budan bólek, oblystyq ákimdik memlekettik tapsyryspen quny 1 mıllıon teńge shamasynda turatyn asúı peshine, 2 mıllıon teńge bolatyn 5 dana planshetke, 4 mıllıon teńgelik teledıdarǵa tapsyrys bergen. Bul málimetterdi qoǵam belsendisi, bloger Islambek Dastan memlekettik tapsyrys saıtynan alyp, óziniń feısbýk áleýmettik paraqshasynda jarııalaǵan bolatyn. Qoǵamnyń qyzý talqysyna túsken aqparattardyń anyq-qanyǵyn bilmek bolyp, Jambyl oblysy ákiminiń baspasóz hatshysy Danııar Asqarulyna habarlastyq.

«Oblystyq ákimdikte 150-ge jýyq qyzmetker eńbek etedi. Kóp jaǵdaıda úılerine baryp tústenýge ýaqyt tapshy bolyp jatady. Osynda ashanamyz bar. Qazir tapsyrys berilgen turmystyq tehnıkalardyń ishinde gaz plıtanyń jeńimpazy anyqtalǵan. Al, planshet - oblys ákiminiń jumysyn nasıhattaýymyz úshin jumys barysynda týǵan qajettilik», - dep jaýap berdi oblys ákiminiń baspasóz hatshysy.

Buǵan deıin biz Taraz qalasy eki aýmaqqa bólinetinin jazǵan bolatynbyz.