Jambyl oblysynyń 80 jyldyǵyna oraı tarıhı-tanymdyq ekspedıtsııa jumysyn bastady

TARAZ. QazAqparat – Jambyl oblysynda «Rýhanı jańǵyrý» baǵdarlamasy aıasynda jáne oblystyń qurylǵanyna 80 jyl, Alash arysy Turar Rysqulovtyń týǵanyna 125 jyl tolýyna oraı «Týǵan ólkem-tunǵan shejire» atty tarıhı-tanymdyq ekspedıtsııa bir jyldyq jumysyn bastady, dep habarlaıdy QazAqparat.

Jastar arasynda óńir týrızmin, onyń ishinde ekotýrızmdi damytý maqsatynda qolǵa alynǵan shara aıasynda T. Rysqulov aýdanynda ekspedıtsııa uıymdastyryldy. Oǵan atalǵan aýdan ákimi Erbolat Sadyrqulov pen ólketanýshy, tarıhshy Bekqquly Áliuly arnaıy qatysty. Olar ekspedıtsııa múshelerimen birge Qaraqystaq shatqalynyń tarıhı oryndarynda bolyp, jastarǵa ólke tarıhyn tanystyryp, úsh shaqyrymdyq taý silemderin jaıaý aralap, tabıǵat aıasynda otandyq týrızmdi damytý týraly oılaryn ortaǵa saldy.

«Bul shara «Rýhanı jańǵyrý» baǵdarlamasy men oblystyń seksen jyldyq mereıtoıy qarsańynda qolǵa alynyp otyr. Munyń taǵylymdy tusy kóp. Bir jaǵynan ekotýrızmdi damytsaq, ekinshi jaǵynan jastardy týǵan jerdiń tabıǵatymen tereńirek tanystyrýǵa múmkindik beredi. Ekspedıtsııa baǵyty keleside aımaǵymyzdyń ózge de tarıhı, mańyzdy oryndaryna arnalatyn bolady»,-dedi aýdan basshysy E.Sadyrqulov.

Ólketanýshy, tarıhshy, zertteýshi, aýdannyń Qurmetti azamaty, «Paryz» qoǵamdyq birlestiginiń tóraǵasy Bekquly Áliuly jastarǵa Uly Jibek joly boıynda orta ǵasyrda ómir súrgen Qaraqystaq qalashyǵy týraly mol maǵlumat berdi.

Taý sileminiń ár tasynda tarıh jatyr, bıik jartastaǵy petroglıf jazýlar, «alǵashqy adamnyń tabany tıgen jer» atanǵan tóbe, túrli tarıhı ataýlary bar jotalar men tóbelerdiń áli de tolyq zerttelmegenin eskersek, bul - aldaǵy ýaqytta kóńil bóletin erekshe dúnıeler. Qaraqystaq Uly Jibek joly boıynda oryn tepken ortaǵasyrlyq qalashyq. Onyń tarıhy tym tereńde. Bul mańaıda alǵashqy adamnyń tabany tıgen tóbe bar. Mundaǵy jartastarda tasqa qashalǵan jazýlar kezdesedi»,-degen B.Áliuly óńirdiń tarıhy áli tolyq zerdelenbegen, qupııasy boıynda tunyp jatqan kıeli ólke ekendigin tilge tıek etti.

Tarıhı-tanymdyq ekspedıtsııa aıasynda «Týǵan ólkem – tunǵan shejire» atty Qaraqystaq shatqalynyń keremet tabıǵatyn beıneleýden konkýrs uıymdastyryldy. Qatysýshylar úsh topqa bólinip, 5 nomınatsııa boıynsha saıysqa tústi. Jeńimpazdar arnaıy syılyqtarmen marapattalyp, sharanyń mańyzdylyǵyn tilderine tıek etti.