Jambyl oblysynyń 80 jyldyǵyna oraı 80 tom kitap jaryq kóredi

TARAZ. QazAqparat – Jambyl oblysynyń qurylǵanyna 80 jyl tolýyn atap ótý boıynsha basqarmanyń is-sharalar jospary bekitildi. Bul týraly «Óńirlik kommýnıkatsııalar qyzmetiniń» aqparat alańynda Jambyl oblysy ákimdiginiń mádenıet, arhıvter jáne qujattama basqarmasynyń basshysy Dúısenaly Byqybaev habarlady, dep habarlaıdy QazAqparat tilshisi.

Atalǵan oblystyq basqarma basshysy josparǵa sáıkes oblystyń mereıtoıyna oraı «Balasaǵun» ortalyq kontsert zalynyń aldynda K.Ázirbaev eskertkishin ashý, óńirden shyqqan óner juldyzdarynyń kontsertin uıymdastyrý, A.Toqpanovtyń eskertkishin ashý, oblystyq qazaq drama teatrynda B.Bekjanovtyń «Aısha bıbi» tarıhı dramasynyń qoıylymyn sahnalaý, jańadan ashylatyn kórkemsýret galereıasynda qylqalam sheberleriniń kórmesin ótkizý jáne Y.Dúkenuly atyndaǵy qalalyq mádenıet úıiniń janynan juldyzdar alleıasyn ashý kózdelip otyrǵandyǵyn jetkizdi.

Sondaı-aq, oblys ákimi Asqar Myrzahmetovtyń bastamasymen «Taraz muralary» atty oblystyń kóptomdyǵyn shyǵarý isi qolǵa alynǵan bolatyn. Al, bıyl oblystyń seksen jyldyǵyna oraı kóptomdyqtyń alǵashqy 80 tomyn shyǵarý kózdelýde eken.

«Qazirgi tańda oblystyń tarıhy men shyǵarmashylyǵyna arnalǵan 80 tom kitaptyń materıaldary ázirlendi. Onyń 21 tomy óńir tarıhyna arnalyp, 59 tomy halyq shyǵarmashylyǵy baǵytynda jaryq kórmek. Jınaqtalǵan materıaldardyń sapasy, mátini, muqabasy, jazylý stıli, sóılemniń qurylýy sarapshylar tobymen tekserilip, 80 tom tolyǵymen «7Su-Company» baspasyna jiberildi. Baspa óz tarapynan baspaǵa deıingi túzetý jumystaryn júrgizip, búgingi kúnge 29 tom kitap basylyp jatyr», -dedi atalǵan basqarma basshysy óz sózinde.