Jambyl oblysyndaǵy joldardan 2 myńnan astam kemshilik anyqtaldy

TARAZ. QazAqparat – Jambyl oblysynda joldardy tekserý barysynda 2 117 aqaý anyqtalǵan. Bul týraly óńirlik kommýnıkatsııalar qyzmeti alańynda ótken brıfıngide oblystyq PD ákimshilik polıtsııa basqarmasynyń bastyǵy Mámbet Smaılov aıtty, dep habarlaıdy QazAqparat tilshisi.

Naqtyraq aıtar bolsaq, respýblıkalyq mańyzy bar avtojoldarda 59 kemshilik, oblystyq mańyzy bar joldarda 81, aýdandyq avtojoldarda 367 jáne de eldi mekenderdiń kóshe-joldarynda 1 610 kemshilik anyqtaldy. Byltyr bul kórsetkish 2 842 bolatyn.

«Jyl bastalǵaly 3 aıda jol qozǵalysy qaýipsizdigi maqsatynda oblys avtojoldaryna 493 tekseris júrgizildi. Sonyń ishinde tekserispen qamtylǵany – 3088 shaqyrym. Tekseris qorytyndysyna sáıkes jol uıymdarynyń basshylaryna oryndaý úshin 493 jazbasha ókim berilgen. Avtokólik joldaryna qyzmet kórsetýdegi kemshilikter boıynsha aýdandyq jáne oblystyq atqarý organdaryna 104 aqparat joldandy, onyń 52 jergilikti organdarǵa joldandy», - dedi, M.Smaılov.

Avtokólik joldaryna qanaǵattanarlyqsyz qyzmet kórsetkeni jáne jol qozǵalysy qaýipsizdigin qamtamasyz etpegeni úshin oblys boıynsha 46 laýazymdyq tulǵa ákimshilik jaýapkershilikke tartylǵan.