Jambyl oblysyndaǵy jaýyngerlik parad tikeleı efırden kórsetiledi

TARAZ. QazAqparat - Jambyl oblysynda ótetin Jeńis kúnine arnalǵan jaýyngerlik parad ulttyq jáne jergilikti telearnalarda translıatsııalanady. Bul týraly oblystyq ákimdiktiń ishki saıasat basqarmasynyń basshysy Ǵalııa Boranbaeva málim etti, dep habarlaıdy QazAqparat.

Onyń aıtýynsha, Qazaqstan Qarýly Kúshteriniń jaýyngerlik kúshi men zamanaýı tehnıkalyq jabdyqtalýyn kórsetetin bul paradqa úsh myńǵa jýyq áskerı qyzmetshi, 300-den astam áskerı tehnıka jáne 30-ǵa jýyq ushý apparattary qatysady. Jaýyngerlik parad ulttyq jáne jergilikti telearnalarda translıatsııalanady. Aýdan ortalyqtaryndaǵy Mádenıet úılerinde arnaıy kórsetilimder uıymdastyrylady.

Spıker Otan qorǵaýshy kúnine arnalǵan basty sharalardyń 7 mamyr kúni 11:00-de Qordaı aýdanynda ótetinin eske saldy. Onda Memleket basshysy Nursultan Nazarbaevtyń qatysýymen jaýyngerlik parad ótedi.

«Jaýyngerlik parad eki bólimnen quralǵan. Birinshi bóliminde qalalar men oblystardyń ákimderine Jaýyngerlik týlar tabystalady. Odan keıin saltanatty marshpen 12 jaıaý parad toby júrip ótedi. Onyń quramynda Qazaqstan armııasynyń Arnaıy operatsııalar kúshteri, Memlekettik kúzet qyzmeti, Ulttyq gvardııa jáne óńirlik áskerlerdiń áskerı qyzmetshileri bar. Ekinshi bólimde bes taktıkalyq epızod kórsetiledi», - dep tolyqtyrdy basqarma basshysy.

Sondaı-aq, bul kúni Jambyl oblysy aýmaǵynda ornalasqan bes áskerı bólimde jáne Qordaı, Merke, Jambyl aýdandaryndaǵy shekaralyq zastavalarda  «Ashyq esik kúnderi» ótedi.