Jambyl oblysyndaǵy jaýynger ólimine qatysy bar kúdikti ustaldy

NUR-SULTAN. QazAqparat – Jambyl oblysynyń «Shóldala» shekara bólimshesindegi jaýynger ólimine qatysy bar bolýy múmkin kúdikti qamaýda otyr. Bul týraly QazAqparat tilshisiniń saýalyna jaýap bergen Іshki ister mınıstrliginiń baspasóz qyzmetinen málim etti.

Vedomstvo dereginshe, shekara qyzmetiniń Jambyl oblysy boıynsha departamentinde merzimdi áskerı mindetin atqaryp júrgen jaýynger Mırash D.B. ólimine qatysty qylmystyq is qozǵalǵan.

Atalǵan oqıǵa QR Qylmystyq kodeksiniń 451-baby 2-bóligine sáıkes (Qyzmetik ókilettikti asyra paıdalanyp, saldary zardapqa ákelip soqtyrǵan) tergelip jatyr.

Qylmystyq isti tergeý jumysymen QR ІІM Ońtústik óńirlik áskerı-tergeý basqarmasynyń Tarazdaǵy bólimi aınalysyp jatyr.

Kúdikti ustalyp, ýaqytsha ustaý ızolıatoryna qamalǵan.

«Tarazdyń mamandandyrylǵan tergeý soty ony qamaýda ustaý jóninde shegshim shyǵardy. QR Qylmystyq-protsestik kodeksiniń 201-baby 1-bóligine sáıkes, sotqa deıingi tergeý derekteri jarııalanbaıdy», - dep málim etti Іshki ister mınıstrliginiń baspasóz qyzmetinen.

Buǵan deıin belsendi Bıbigúl Ramazan óziniń Facebook paraqshasynda Jambyl oblysynda merzimdi áserı mindetin atqaryp júrgen sarbazdyń qaıtys bolǵanyn jazǵan bolatyn.

Onyń málimetinshe, 18 jastaǵy jaýynger ózine qol jumsaǵan.

Qosa keteıik, buǵan deıin Almatydaǵy 3650 áskerı bóliminde kelisimshart boıynsha qyzmet etip júrgen áskerı qyzmetshi kóz jumǵanyn habarlap edik.