Jambyl oblysyndaǵy kásiporyndarda 2,2 mlrd teńge durys jumsalmaǵan

TARAZ. QazAqparat - Jambyl oblysynda ishki aýdıt qyzmetiniń jumysy júıelendirilmek, dep habarlaıdy QazAqparat tilshisi Jambyl oblysy ákimdiginiń baspasóz qyzmetine silteme jasap.

Іshki aýdıt qyzmetiniń basshysy Dýman Taıleevtiń aıtýynsha, 2018 jyly júrgizilgen memlekettik aýdıt kezinde 38 nysan qamtylǵan. Al óńirde tekseris júrgizilýi tıis mekemelerdiń jalpy sany bir jarym myńnan asady.

Aýdıt júrgizilgen nysandardyń 27-si memlekettik kommýnaldyq mekemeler, jeteýi - memlekettik kommýnaldyq qazynashylyq kásiporyndar, qalǵan tórteýi - sharýashylyq quqyǵyndaǵy kásiporyndar. Aýdıt kezinde jalpy 2 mlrd 219 mln teńgeni jumsaýda kemshilikterge jol berilgendigi anyqtaldy. Úsh laýazymdy tulǵa ákimshilik jaýapqa tartylyp, olarǵa 757 myń teńge aıyppul salynǵan.

D. Taıleevtiń aıtýynsha, bir mekemeni tekserýge eki apta, keıde jyl da jetpeı jatady. Barlyǵyn qysqa merzimde tekserip shyǵý múmkin emes. Onyń ústine vedomstvoda kadr tapshylyǵy baıqalatyn kórinedi. Spıkerdiń aıtýynsha, qazir onyń shtatynda nebári toǵyz adam jumys istep júr.

Jaýapty mamandardyń deńgeıin tekserip, qajet bolǵanda biliktiligin arttyrý sharalaryn qarastyrýdy jýyrda óńir basshysy Asqar Myrzahmetov te aıtqan bolatyn. Sondaı-aq, ákim sala basshylaryna ishki aýdıt qyzmetiniń jumysyn júıeli etýdi de tapsyrdy.

Aıta keteıik, Jambyl oblysy ishki aýdıt qyzmeti jumysynyń qorytyndylary boıynsha respýblıkada ekinshi orynda tur.

Avtory Galına Skrıpnık