Jambyl oblysyndaǵy balalar úıiniń túlekterine páter kilti tabys etildi

TARAZ. QazAqparat – Jambyl oblysynyń ákimi Nurjan Nurjigitov Halyqaralyq balalardy qorǵaý kúnine oraı ómirlik qıyn jaǵdaıdaǵy balalardy qoldaý ortalyǵyna bardy, dep habarlaıdy QazAqparat tilshisi.

2018 jyly atalǵan mekeme Q.Sarymoldaev atyndaǵy balalar úıi men kámeletke tolmaǵandardy ońaltý jáne beıimdeý ortalyǵyn biriktirý arqyly qaıta qurylǵan bolatyn. Búginde munda 75 bala tárbıelenýde. Eki qabatty ǵımaratta sabaq ótkizýge arnalǵan kabınetter, akt zaly, «Rýhanı jańǵyrý» kabıneti, kitaphana, kovorkıng ortalyǵy, mýzeı, fızıoterapııa kabıneti, medıtsınalyq kabınet, sport jáne shahmat zaldary bar. Mekemede kásiptik baǵdarlaý ortalyǵy jumys isteıdi, onda balalar shashtaraz, etikshi, aspaz, qolóner jáne dızaınerlik shyǵarmashylyq, is tigý boıynsha bilim ala alady. Ortalyq tárbıelenýshileri 7 topqa bólingen. Mekeme ǵımaratyn jabdyqtaýǵa jergilikti kásipkerler jıi qol ushyn sozyp otyrady.

Oblys ákimi jatyn bólmelerdi, kabınetterdi aralap, balalardy áńgimege tartty.

Nurjan Nurjigitov qurmetti qonaq retinde balalardy qorǵaý kúnine arnalǵan kontserttik baǵadarlamany tamashalady.

Sondaı-aq, tárbıelenýshilerdiń salǵan sýretterinen kórme daıyndalǵan.

«Balalar – elimizdiń erteńi, bolashaǵymyz. Bizdiń negizgi mindetimiz – balalarymyzdy qorǵaý, olardyń balalyq shaqtarynyń alańsyz ótýine jaǵdaı jasaý.

Memleket basshysynyń tapsyrmasyna sáıkes balalardyń jan-jaqty jáne laıyqty damýy úshin barlyq jaǵdaılardy jasaý, balalardy qoldaý boıynsha aýqymdy jumystar atqarylýda. Oblysta jyl saıyn jańa mektepter, qosymsha bilim berý mekemeleri salynýda.

Jaqynda oblys ortalyǵynda zamanaýı oqýshylar saraıy ashyldy. Ult ustazy Ahmet Baıtursynov: «Baı bolý úshin – kásip kerek!» deıdi. Munda materıaldyq baılyq emes, rýhanı baılyq týraly aıtylǵan. Sizderdiń bolashaqta naǵyz kásibı maman bolyp, Otanymyzdyń gúldenýi úshin aıanbaı eńbek etýlerińiz asa mańyzdy. Barshańyzǵa sáttilik pen úlken jeńister tileımin!» – dedi oblys ákimi óziniń quttyqtaý sózinde.

Balalardy merekemen quttyqtaǵan aımaq basshysy olarǵa estelik syılyqtar tartý etti.

Saltanatty shara barysynda oblys ákimi Q.Sarymoldaev atyndaǵy burynǵy balalar úıiniń tárbıelenýshisi Zakır Seıitqanovqa jáne jetim balalar men ata-anasynyń qamqorlyǵynsyz qalǵan balalarǵa arnalǵan V.Savva atyndaǵy mektep-ınternatynyń tárbıelenýshi-túlekterine Sandýǵash Imanqulovaǵa Taraz qalasynyń 15 shaǵyn aýdanynan jańa páterlerdiń kiltterin tabystady.

Oblys ákimi jańa qonys ıelerin quttyqtap, olarǵa baqyt pen amandyq tiledi.

Foto: gov.kz