Jambyl oblysyndaǵy aýylǵa 70 jyldan keıin aýyz sý tartyldy

TARAZ. QazAqparat – Jambyl oblysyndaǵy Shoqaı aýylyna taza aýyz sý berildi. Aımaq basshysy Berdibek Saparbaev Jambyl aýdanyna jumys sapary barysynda atalǵan aýyldaǵy júrgizilgen taza aýyz sý júıesiniń qurylysymen tanysty, dep habarlaıdy QazAqparat tilshisi.

Ótken jyldyń naýryz aıynda bastalǵan qurylys jumystary «Óńirlerdi damytý» baǵdarlamasy aıasynda júrgizilgen.

800 turǵyny bar aýylǵa 15 shaqyrymdy quraıtyn sý qubyry tartylǵan. Solaısha, 160 aýlaǵa sý jiberý tetikter ornatylǵan.

70 jyldan beri qudyqtan sý iship kelgen aýyl turǵyndary bul oqıǵanyń tamasha tartý bolǵanyn aıtýda.

«Sońǵy kezderi aýyz sýdyń quramy da ózgere bastaǵan edi. Minekeı, búgin turǵyndardyń talaı jylǵy armanynyń oryndalǵanyn kórip otyrmyz. Aýyl jaǵdaıy jyl sanap jaqsaryp keledi. Bıyl aýylda klýb salynsa, «Jomart túlek» jobasy aıasynda aýylǵa arka ornatyldy. Endi oqý ordasynyń qurylysy bastalmaq», - dedi shoqaılyq Ismaıl Hodjýmýratov.

Berdibek Saparbaev sý munarasyn aralap, qondyrǵylardyń jaı-kúıin qarap kórdi.

Aıta keteıik, búginde Jambyl aýdandaǵy 42 eldi mekenniń 30-y ortalyqtandyrylǵan aýyz sý júıesimen qamtylǵan. Memlekettik «Jumyspen qamtýdyń jol kartasy» baǵdarlamasy aıasynda ótken jyly Jasórken, Qyzylqaınar, Aqbulym, Báıterek, Qarataý aýylyna aýyz sý qubyry tartylsa, endi tirshilik nárimen Shoqaı aýyly qamtylyp otyr. Osylaısha, 2019 jyly aýyzsýmen qamtý úlesi aýdanda 45,2 paıyzdy qurasa, 2020 jyly bul kórsetkish 69 paıyzǵa jetti. Al, aǵymdaǵy jyly sapaly aýyz sýmen qamtý úlesin 71,4 paıyzǵa jetkizýdi kózdelgen.