Jambyl oblysynda jol apatynan 1 adam qaza taýyp, 6-ýy jaraqattandy
19:10, 15 Qazan 2021
TARAZ. QazAqparat – Jambyl oblysynda eki avtokólik soqtyǵysyp, bir adam kóz jumdy, dep habarlaıdy QazAqparat tilshisi.
Jambyl oblysynda jergilikti mańyzy bar Taraz-Sarykemer avtojolynyń 6-shaqyrymynda Audi-B4 markaly avtokóliginiń 27 jastaǵy júrgizýshisi Sarykemer aýylynan Taraz qalasyna baǵyt alyp kele jatyp, qarsy qozǵalys jolaǵyna shyǵyp ketken. Onda 21 jastaǵy jergilikti turǵynnyń basqarýyndaǵy VAZ-2104 markaly kólikpen soqtyǵysqan.
«Jol-kólik oqıǵasy saldarynan VAZ-2104 markaly avtokóliginiń júrgizýshisi esin jımastan, oqıǵa ornynda kóz jumyp, 6 adam túrli dene jaraqattarymen Sarykemer aýdandyq aýrýhanasyna jatqyzyldy», - delingen Polıtsııa departamenti baspasóz qyzmetiniń habarlamasynda.
Qazirgi ýaqytta tergeý amaldary júrgizilip, birqatar tıisti saraptama taǵaıyndaldy.