Jambyl oblysynda jańa sý qoımalaryn salý kerek - senator
Depýtat bul taqyrypty el Premer-Mınıstriniń atyna joldaǵan depýtattyq saýalynda kóterdi.
Senatordyń aıtýynsha, sýarý sýynyń jetispeýshiligine baılanysty transshekaralyq problemalar óńirdegi aýyl sharýashylyǵynyń damýyna, demek, eldiń azyq-túlik qaýipsizdigine keri áserin tıgizýde.
«Jambyl óńirinde ırrıgatsııalyq maqsattar úshin paıdalanylatyn sý resýrstarynyń 85 paıyzy Qyrǵyz Respýblıkasynyń aýmaǵynda qalyptasady. Sol sebepti, vegetatsııa kezeńinde 1983 jyly qabyldanǵan «Transshekaralyq Shý jáne Talas ózenderi aǵyndylarynyń sýyn bólý týraly» kelisiminiń sharttaryna jáne onyń ekinshi tarappen oryndalýyna táýeldi bolyp keledi. Atalǵan kelisimge sáıkes, óńirge Shý ózeniniń basseıni boıynsha 370 mln tekshe metr jáne Talas ózeni boıynsha 590 mln tekshe metr sý tıesili. Degenmen, qyrǵyz tarapynyń bekitilgen kestelerdi saqtamaýyna baılanysty, Qazaqstan jyl saıyn Shý ózeninen 50 paıyzǵa deıin, Talas ózeninen 25 paıyzǵa deıin sýdy ala almaıdy»,- dedi senator.
Bıyl Shý jáne Talas ózenderi basseınderindegi qar qorynyń azdyǵynan tapshylyqtyń artýy múmkin ekeni jaǵdaıdy qıyndatyp otyr.
«Barlyq sý qoımalarynyń tehnıkalyq-ekonomıkalyq negizdemelerine memlekettik saraptamanyń oń qorytyndysy alynyp, jobalyq-smetalyq qujattama ázirleýge qarajat bólý máselesi qarastyrylýda. Alaıda, salalyq mınıstrlikpen tıisti ótinimder joldanǵanymen, búgingi kúnge deıin oń sheshimin tappaı otyr. Sý qoımalaryn salý tek vegetatsııalyq kezeńde Qyrǵyz Respýblıkasyna táýeldilikti azaıtyp qana qoımaı, Jambyl oblysynyń Qordaı, Merki, Baızaq, Jambyl jáne Talas aýdandarynda aýyl sharýashylyǵy daqyldarynyń ósýine úlken áserin beredi, sondaı-aq, osy aýdandardyń turǵyndary arasyndaǵy áleýmettik shıelenisti tómendetýge de kómektesedi»,- dedi depýtat.
Senator sonymen qatar, qurylys jumystary aıaqtalǵannan keıin, óndiristiń rentabeldiligi 30 paıyzdan asyp, jalpy ónimniń ósimi shamamen 17 mlrd teńgeni quraıtyndyǵyn jáne 3 myńǵa jýyq jumys orny ashylyp, halyqtyń ál-aýqaty jaqsarýy kútiletinin atap ótti.