Jambyl oblysynda jańa mektep paıdalanýǵa berildi

TARAZ. QazAqparat – Búgin Jambyl oblysy Jambyl aýdany Shoqaı aýylynda 150 oryndyq №3 orta mekteptiń jańa ǵımaraty paıdalanýǵa berildi. Bul týraly QazAqparat oblys ákiminiń baspasóz qyzmetine silteme jasap habarlaıdy.

«Qazirgi tańda oblys mektepteriniń materıaldyq-tehnıkalyq bazasy nyǵaıyp, jańa mektepter soǵylyp, apatty, úsh aýysymdy, oqýshy orny tapshylyǵy bar mektepterdiń máselesi tıimdi sheshimin taýyp jatyr. Bul óz kezeginde bilim salasynda birqatar jetistikterge jetýge múmkindik beredi», - dedi oblys ákiminiń birinshi orynbasary Nurjan Kalenderov mekteptiń ashylý saltanatynda.

Sondaı-aq, ol oblys basshysynyń atynan mektepke 10 noýtbýkty syıǵa tapsyrdy.

Jańa mektepte ashana, sport jáne májilis zaly, sheberhana, kitaphana, tigin bólmesi, robototehnıka sekildi qajetti bólmeler bar. Bilim ordasynda 200-den asa oqýshy oqıdy, olardyń jartysynan astamy ystyq tamaqpen qamtylady.

Bıyl bilim salasyna 284,8 mlrd teńge bólindi, bul – oblys bıýdjetiniń 50 paıyzynan astamy. 25 bilim nysanynyń qurylysy júrip jatyr. Jyl sońyna deıin 9 mektep pen 5 mekteptiń japsarlas qurylysy aıaqtalyp, paıdalanýǵa beriledi. Al, 11 nysan qurylysy 2024 jyly aıaqtalady.

Budan bólek, 17 bilim berý nysany kúrdeli jóndeýden ótkiziledi. Sondaı-aq, 2,5 mlrd teńgege mektepter jańǵyrtylyp jatyr, onyń ishinde bilim berý nysandarynyń qaýipsizdigine 1,8 mlrd teńge bólindi.