Jambyl oblysynda jalǵyzbasty anaǵa aýyldastary úı salyp berdi

TARAZ. QazAqparat – Baızaq aýdany Báıterek aýyldyq okrýginde «Asarlatyp úı salý» jobasy aıasynda eki balany jalǵyz tárbıelep otyrǵan ana Nasıba ıÝldasheva baspanaly boldy, dep habarlaıdy QazAqparat tilshisi.

Kilt tapsyrýǵa arnalǵan saltanatty sharaǵa qatysqan aýdan ákiminiń orynbasary Dáýir Dáýletov Elbasynyń «Bolashaqqa baǵdar: rýhanı jańǵyrý» baǵdarlamasy aıasynda Jambyl oblysy ákiminiń qoldaýymen qolǵa alynǵan «Asarlatyp úı salý» jobasymen búgingi kúnge deıin aýdanda 6 úı paıdalanýǵa berilgenin atap ótti.

Aýyl turǵyndarynyń yntymaǵy men aýyzbirshiligin kórsetken ıgi bastamanyń mańyzyna toqtalyp, atsalysqan jomart júrekti azamattarǵa alǵysyn aıtty.

Báıterek aýyldyq ardagerler keńesiniń tóraǵasy Jıenǵalı Jumaǵulov atalǵan jobanyń sharapaty mol ekendigin jetkizdi.

Budan soń qaıyrymdy istiń bel ortasynda bolyp, demeýshilik tanytqan azamattarǵa qurmet kórsetildi. Atap aıtqanda, turǵyn úıdiń salynýyna aıryqsha úles qosqan jeke azamattar men kásipkerler aýdan ákimi, aýdandyq máslıhat jáne «Nur Otan» partııasy aýdandyq fılıalynyń gramotasymen jáne alǵys hatymen marapattaldy.

«Ár otbasynyń óz úıi bolsa, ol – baqyt. Mine, búgin osy baqytty sezinip otyrmyn. Baspanaly bolýyma jaǵdaı jasap, armanymnyń oryndalýyna járdem etken oblys, aýdan basshysyna, barlyq azamattarǵa shyn nıetimmen alǵys aıtqym keledi»,– deıdi qonys toı ıesi.

Jeke kásipker Baqytjan Jumabekovtiń demeýshiligimen turǵyn úıdiń tóńiregine eýroqorshaý ornatylǵan. Al, janashyr turǵyn Omaralı Halıev baspana ıesiniń qorasyna 3 bas qoıdy baılap, jemshóp jetkizip beripti.

Sondaı-aq, márt azamattardyń qoldaýymen balalar kerýeti, ashana jıhazy, shaǵyn stol men oryndyq alynǵan eken. Jaqsylyqqa umtylǵan jandar arqyly qonys toıyn toılap otyrǵan otbasynyń qýanyshynda shek joq.