Jambyl oblysynda jalǵan tehpasport jasaýmen aınalysqandar ustaldy

TARAZ. QazAqparat – Jambyl oblysynda kólik quralyn tirkeýdiń jalǵan kýálikterin daıyndaýmen aınalysqandar ustaldy, dep habarlaıdy QazAqparat Polisia.kz saıtyna silteme jasap.

Jambyl oblysy polıtsııa departamenti uıymdasqan qylmysqa qarsy kúres basqarmasynyń qyzmetkerleri jedel izdestirý is-sharalaryn júrgizý kezinde kólik quralyn tirkeýdiń jalǵan kýálikterin (tehnıkalyq pasporttardy) daıyndaǵandardy ustady. Olar – Shý aýdany mamandandyrylǵan halyqqa qyzmet kórsetý ortalyǵynyń qyzmetkeri jáne onyń sybaılasy – osy mekemeniń burynǵy qyzmetkeri.

Áıel adam deldal retinde áreket etken. 150 myń teńge kólemindegi zańsyz aqshalaı syıaqy úshin sybaılasymen birge qujattardy burmalaý jolymen jalǵan tehnıkalyq pasporttardy daıyndaýmen jáne ótkizýmen aınalysqan. Tintý barysynda kúdiktiniń atyndaǵy 8 plastıkalyq bankomat kartochkasy, 41 jalǵan tehnıkalyq pasport, tehnıka jáne odan ári jalǵan qujattardy daıyndaý úshin ázirlengen 500 dana plastıkalyq kartochka tabyldy jáne tárkilendi. Osy derekke qatysty Qazaqstan Respýblıkasy Qylmystyq kodeksiniń 385-baby 2-bóligi (Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý) boıynsha sotqa deıingi tergeý amaldary bastaldy. Birqatar tıisti saraptamalar taǵaıyndaldy.

Foto: polisia.kz