Jambyl oblysynda zaqymdalǵan temirjol bóligi jabyq tur

TARAZ. QazAqparat - Jambyl temirjol bóliminde bolǵan oqys oqıǵanyń egjeı-tegjeıi belgili bola bastady, dep habarlaıdy «QazAqparat» HAA tilshisi.

«Shý - Otar baǵdarynyń «QTJ-Júk tasymaly» kompanııasyna tıesili №3406 júk poıyzynyń 15 vagony relsten shyǵyp, toǵyzy aýdarylǵan. Sonyń saldarynan úsh jolaýshy poıyzy keshikti, poıyzdar ekinshi jolmen júrip jatyr. Qurbandar men zardap shekkender joq», - dep málimdedi Jambyl oblystyq TJD baspasóz qyzmeti.

Jambyl oblystyq TJD basshysy Baǵdat Danılovtyń sózine qaraǵanda, vagondardyń aýdarylýynan temirjol jáne elektr baǵandaryna zaqym tıgen. Al vagondardyń joldan shyǵyp ketýine dál ne sebep bolǵany áli tolyq belgili emes. «Oqıǵa ornynda qazir «Qazaqstan temir jolynyń» arnaıy komıssııasy jumys istep jatyr. Komıssııanyń tekseristeriniń qorytyndysy keıin jarııalanady», - deıdi ol.

Oqıǵa ornynda «QTJ» UK» AQ-nyń 110 qyzmetkeri jumys istep jatyr, 13 tehnıka, eki drezına, Shý jáne Almaty stansalarynyń eki qalpyna keltirý poıyzy jumyldyrylǵan.

Eske sala keteıik, buǵan deıin 12 aqpan kúni 13 saǵat 53 mınýtta Jambyl jol bóliminiń Shý-Otar ýchaskesiniń Kóktóbe-Espe aralyǵynda №3406 júk poıyzynyń vagondary relsten shyqqany týraly habar bergen edik.