Jambyl oblysynda ustaz mektepte tropıkalyq jemister ósiredi

TARAZ. QazAqparat – Jambyl oblysy Qordaı aýdanyndaǵy №50 ál-Farabı atyndaǵy orta mektepte bastaýysh synyp muǵalimi tropıkalyq jemisterdi gúl otyrǵyzatyn qutylarda ósiredi, dep habarlaıdy QazAqparat tilshisi. Oqýshylardy baǵbandyqqa baýlyp júrgen bilim mekemesinde jemister ósirýge arnalǵan arnaıy synyp ta bar.

«Tropıkalyq jemisterdi ósirý arqyly oqýshylaryma barlyq isti óz qolymyzben jasaýdyń múmkin ekendigin kórsetkim keledi. Sonymen qatar, bul oqýshylardyń sabaqtan tys ýaqytyn tıimdi paıdalana otyryp, olardy eńbekke baýlýdyń taptyrmas múmkindigi», – deıdi aǵartýshylyq pen baǵbandyqty qatar alyp júrgen Saltanat Qydyrbaeva.

Búginde ustaz oqýshylarymen birlesip, adam aǵzasyna paıdaly, dárýmenge baı banannan bastap ananas, anar, lımon, mandarın men laım kóshetterin baptap, ósirýde. Banan aǵashynyń óskinine 3 jyl bolsa, ananas aǵashyn ósirýdi 5 jyldan beri zerttep, túrli ádisterin jasap kórgen eken. Tek bıyl ǵana jemis salatyn gúli kúltelenip, túıin salǵan. Balalardy baǵbandyqqa baýlyp, izdenisimen eldi súısindirgen Saltanat Qydyrbaeva aldaǵy ýaqytta jemisterdi jaıqaltý úshin jylyjaı salýdy da maqsat etip otyr. Buǵan deıin Jambyl oblysynda oqýshylar 100% saýyqtyrý, demalys sharalarymen qamtylatynyn jazǵan bolatynbyz.