Jambyl oblysynda úsh birdeı ámbebap sport alańy ashyldy
Jańa nysandar Baızaq aýdanynyń Sarykemer aýylynda, Qordaı aýdanynyń Masanshy aýylynda jáne Taraz qalasynyń Qarataý-2 shaǵyn aýdanynda paıdalanýǵa berildi.
Sport alańdarynyń jobasyn «Samruk-Kazyna Trust» áleýmettik jobalardy damytý qory oblys ákimdigimen birlesip júzege asyrǵan.
Jańa sport jáne oıyn keshenderi birneshe bólikten turady. Atap aıtsaq, jasandy kógaly bar 30 kórermenge arnalǵan fýtbol, «workout» jáne balalarǵa arnalǵan qum-tóbeshik, átkenshegi bar oıyn alańdarymen qamtylǵan. Alańnyń perımetri boıynsha qoqys salatyn oryndyqtar men ýrnalar ornatylǵan. Mundaı bir keshenniń aýmaǵy 1300 sharshy metrdi quraıdy.
Tarazdaǵy alańnyń saltanatty ashylýyna Jambyl oblysynyń ákimi Berdibek Saparbaev arnaıy qatysty.
«Memleket basshysy elimizde barlyq jastaǵy azamattar arasynda buqaralyq sportty damytýdy tapsyrdy. Ol úshin sporttyq ınfraqurylym halyqqa qoljetimdi bolýy tıis. Búginde bizdiń oblysta sportpen belsendi aınalysý úshin barlyq jaǵdaı jasalǵan. Aǵymdaǵy jyly sport nysandarynyń ınfraqurylymyn jańartý boıynsha 120 joba júzege asyrylýda. Balalardyń sportqa degen súıispenshiligin arttyrý arqyly biz olardy jaǵymsyz ádetterden saqtaı alamyz. Deni saý balalar – bizdiń bolashaǵymyz», - dedi Berdibek Saparbaev.
Kútip ustaý men qyzmetin qamtamasyz etý úshin nysandar jergilikti atqarýshy organdardyń balansyna berilmek.
«Bul alańdar balalarǵa da, eresekterge de qol jetimdi, olarǵa kirý tegin. Nysandar salaýatty ómir saltyn qoldaý jáne balalar sportyn damytý, qalalar men aýdandardyń turǵyndaryn zamanaýı sporttyq ınfraqurylymmen qamtamasyz etý maqsatynda salyndy», - dep atap ótti «Samruk-Kazyna Trust» qorynyń resmı ókili Mıras Irgebaev.
Esterińizge sala keteıik, ámbebap alańdardy ornatý jobasyn «Samruk-Kazyna Trust» qory «Meniń elim» áleýmettik ınvestıtsııalar baǵdarlamasy aıasynda júzege asyrýda.