Jambyl oblysynda úsh aıda 3 ana ólimi tirkelgen

TARAZ. QazAqparat – Jambyl oblysynda bıylǵy birinshi toqsanda 3 ana ólimi tirkeldi. Bul týraly Óńirlik kommýnıkatsııalar qyzmeti alańynda oblystyq Densaýlyq saqtaý basqarmasy basshysynyń orynbasary Hamıt Myrzaqasymov aıtty, dep habarlaıdy QazAqparat tilshisi.

Jambyl oblysynda bıyl medıtsınalyq qural-jabdyqtar satyp alýǵa 2,477 mlrd qarajat bólindi. Oǵan emdeý-aldyn alý uıymdaryna 120 dana medıtsınalyq qural-jabdyq alý josparlanǵan.

Ol brıfıngte «Nur Otan» partııasynyń «Ózgerister joly: ár azamatqa laıyqty ómir!» atty saılaýaldy baǵdarlamasyn iske asyrý jónindegi Jol kartasynyń oryndalýy boıynsha túrli baǵyttarǵa toqtalyp ótti.

Medjabdyqtar alý baǵdarlamadaǵy 70-shi baǵytqa jatady. Jalpy, Jol kartasynda densaýlyq saqtaý salasyna qatysty 12 tarmaq bar.

«Jol kartasy boıynsha jumystarǵa toqtalar bolsam, búginde Taraz qalasynda 200 tósek-oryndyq oblystyq onkologııalyq dıspanser salynýda. Onyń qurylysy 2018 jyldyń qarasha aıynda bastalǵan. Sondaı-aq, oblys boıynsha jalpy ólim-jitim kórsetkishin tómendetý, náreste ólim kórsetkishin azaıtý boıynsha atqarylatyn jumystarǵa arnalǵan tarmaqtar bar. Jalpy, aǵymdaǵy jyldyń 1 toqsanynda óńirde 3 ana ólimi tirkelip, kórsetkish - 45,0-di qurady», - dedi H.Myrzaqasymov.

Sonymen qatar, Jol kartasynda jedel medıtsınalyq kómekti tsıfrlandyrýǵa, jasandy ıntellektti engizýge, sondaı-aq, telemedıtsına arqyly onlaın-konsýltatsııalar sanyn arttyrýǵa da aıryqsha nazar aýdarylǵan. Ol boıynsha bıyl jedel medıtsınalyq kómekti tsıfrlandyrý jumystaryn 70 paıyzǵa jetkizý jáne 550 konsýltatsııalyq keńes ótkizý josparlanǵan. Budan bólek Tarazda qalasy Qarasý turǵyn alabyndaǵy «Densaýlyq» alleıasyn abattandyrý jumysyna da den qoıylǵan. Onda pandemııa kezinde qaıtys bolǵan medıtsına qyzmetkerlerine memorıaldyq taqta ornatý boıynsha jumystar júrgizilýde.