Jambyl oblysynda urlanǵan qarý jasyrylǵan qoımalar anyqtaldy

NUR-SULTAN. QazAqparat – Qańtar oqıǵasy kezinde urlanǵan 2 myń qarý tabylmaı jatyr. Bul týraly QR Іshki ister mınıstrligi Tergeý departamentiniń basshysy Sanjar Ádilov aıtty, dep habarlaıdy QazAqparat tilshisi.

«Qańtar oqıǵasy kezinde kóptegen qyzmettik jáne azamattyq qarý urlanyp, bul azamattardyń qaýipsizdigine naqty qaýip tóndirdi. Qazirgi kezde qabyldanǵan sharalar aıasynda 873 qarý anyqtalyp tárkilendi, onyń ishinde 480 tabeldik jáne 387 azamattyq qarý bar», - dedi Sanjar Ádilov Ortalyq kommýnıkatsııalar qyzmetinde.

Osy oraıda ol birqatar adam qarý urlaǵany úshin qylmystyq jaýapqa tartylǵanyn eske saldy.

«Osy qylmystyń aýyrlyǵy men qoǵamǵa qaýiptiligin eskere otyryp, sottar da sáıkes jaza taǵaıyndap jatyr. 5 qańtarda Almaty qalasyndaǵy jappaı tártipsizdik kezinde tórt adamnan turatyn top mamandandyrylǵan dúkennen qarý-jaraq pen oq-dári jáne saýda úıinnen basqa da taýarlar urlaǵan. Qabyldanǵan sharalardyń arqasynda kúdiktiler anyqtalyp, olardan urlanǵan qarý men taýardyń bir bóligi tárkilendi. Qylmystyq is sotqa joldandy. 5 tamyzda Almaty qalasy Almaly aýdanynyń soty aıyptalýshylardy kináli dep tanyp, árqaısysy 5 jylǵa bas bostandyǵynan aıyryldy», - dedi vedomstvo ókili.

Onyń sózine qaraǵanda, qazirgi ýaqytta polıtsııa urlanǵan qarýdy ǵana emes, jalpy zańsyz aınalymdaǵy qarýdy tabý jáne tárkileý boıynsha jumysty jalǵastyryp jatyr.

Jýyrda (15 tamyz) Taraz qalasynda polıtsııa qyzmetkerleri zırat aýmaǵynan eki jasyrylǵan qoımany tapty. Olardyń birinde eki oq saýyty bar «Valter» tapanshasy, 16 kalıbrli patron, al ekinshisinde nomeri óshirilgen 12 kalıbrli ańshylyq myltyq, oq saýyty bar «Mauser» gaz tapanshasy, ártúrli kalıbrli 60 patron tabyldy.

«17 tamyzda Jambyl oblysynyń Andas aýylynda polıtsııa qyzmetkerleri qaraýsyz qalǵan úıden jasyryn qoımany tapty. Onda 12 kalıbrli myltyq, sondaı-aq buryn Polıtsııa departamentinen urlanǵan brondy keýdeshe jáne túrli kalıbrli patrondar tabyldy. Sol kúni Merki aýdanyndaǵy Aqtoǵan aýylynyń shetinde polıetılendi paket tabylyp, ishinen nomeri óshirilgen eki ańshylyq myltyq pen túrli kalıbrli oq-dári tárkilendi», - dedi S. Ádilov.

18 tamyzda Almaty qalasynyń Túrksib aýdanynda «Kishi Almaty» ózeniniń janynda qarý-jaraq saqtalǵan jasyryn qoıma anyqtaldy. Ol jerden IJ-27, 12 kalıbrli tegis uńǵyly myltyq, pnevmatıkalyq tapansha, túrli kalıbrli 100-ge jýyq patron tárkilendi.

«Qazir urlanǵan qarýdyń 2087-si anyqtalmaǵan kúıinde qalyp otyr. Olardy izdestirý boıynsha jumystar jalǵasyp keledi», - dedi S. Ádilov.