Jambyl oblysynda UQShU oqý-jattyǵýlarynyń belsendi kezeńi aıaqtaldy
Oqý-jattyǵýlardyń sońǵy kúninde birikken toptyń aldynda «qarsylastyń» shabýylyna toıtarys berý, oǵan barynsha shyǵyn keltirý jáne qarsy shabýylǵa shyǵý úshin jaǵdaı jasaý mindetteri turdy.
Kontıngenttiń barlyq shabýyldaýshy quraldary áýedegi, jerdegi, radıolokatsııalyq, optıkalyq-elektrondyq barlaý keshenderiniń qoldaýymen biryńǵaı aqparattyq-jaýyngerlik keńistikte jumys istedi.
«Qorytyndy kezeńde UQShU-nyń Ujymdyq jedel áreket etý kúshteri «Ońtústik» óńirlik qolbasshylyǵynyń quramalarymen jáne bólimderimen toptasyp, shartty qarsylasty toıtaryp, joıý jónindegi birlesken operatsııany pysyqtady. Áskerı qyzmetshiler is-qımyldy júz paıyz pysyqtap shyqty. Jerústi áskerlerimen jáne avıatsııamen ózara áreket etýde barlyq oqý-jaýyngerlik mindetterdi sapaly oryndaǵan zymyran áskerleri men artıllerııa bólimshelerin erekshe atap ótkim keledi», - dep «Ońtústik» óńirlik qolbasshylyǵy áskerleriniń qolbasshysy, general-maıor Mereke Kúshikbaev oqý-jattyǵý qorytyndysyn oń baǵalady.
Qazaqstan Áskerı-áýe kúshteri men Reseı áskerı-ǵarysh kúshteriniń maıdandyq jáne armııalyq avıatsııasy aralas avıatsııalyq toptardyń quramynda koalıtsııanyń qurlyq bólimsheleri atys júrgizý, búrkemeleý jáne qamtamasyz etý, taktıkalyq áýe desantyn túsirý, jaralylar men naýqastardy evakýatsııalaý jónindegi mindetterdi oryndady.
Sý-30SM kópfýnktsıonaldy, Sý-25 shabýyldaýshy joıǵyshtary, Mı-17, Mı-35M armııalyq avıatsııa tikushaqtarynyń ekıpajdary shartty qarsylastyń jer ústi nysandaryna basqarylmaıtyn jáne basqarylatyn avıatsııalyq zymyrandar men bombalar jiberip, oq jaýdyrdy.
S-295 ushaqtarymen áskerı-kólik avıatsııasynyń ushqyshtary áskerı múlikti, oq-dárilerdi jáne taktıkalyq desantty shartty aımaqtarǵa jetkizý tapsyrmalaryn oryndady.
Oqý-jattyǵý barysynda tájirıbede avıatsııalyq-zymyrandyq soqqylardan bastap, ushqyshsyz basqarylatyn qurylǵylarǵa deıingi túrli tıptegi áýe shabýylynyń quraldaryn toıtarys berý is-qımyldary pysyqtaldy.
Qarsylasty jeńý, jaýyngerlik tehnıkany isten shyǵarý, oq-dáriler men materıaldyq qorlardy joıý barysynda otshashar, áýe, radıolokatsııalyq, arnaıy jáne optıkalyq-elektrondyq barlaý quraldary qoldanyldy.
Bólimshelerdiń shabýylǵa shyǵýyn tankke qarsy vzvod qamtamasyz etti, onyń atysymen bekinisti qurylystar, atys núkteleri, tankter jáne jaýdyń ózdiginen júretin artıllerııalyq qondyrǵylary talqandalyp, joıyldy.
Avıatsııa soqqylary men artıllerııadan oq atý arqyly birinshi eshelon bólimsheleri shabýylǵa shyǵyp, qarsylastyń qorǵanysyn buzdy.
Ekinshi eshelon quramynda kúsh-jigerdi arttyrý úshin Qazaqstannyń Desanttyq-shabýyldaý áskerleri men Belarýstiń Arnaıy operatsııalar kúshteri mindetterdi oryndaýǵa kiristi, olar shartty qarsylastyń tobyn talqandaýdy aıaqtady.
Buǵan deıin 26 qyrkúıek pen 8 qazan aralyǵynda Jambyl, Almaty oblystarynda UQShU-nyń ujymdyq jedel den qoıý kúshteriniń «Ózara is-qımyl-2022», «Іzdeý-2022», «Eshelon-2022» oqý-jattyǵýy ótetini habarlanǵan.
Jambyl oblysynda UQShU oqý-jattyǵýlary saltanatty túrde ashyldy.
Foto: QR Qorǵanys mınıstrligi