Jambyl oblysynda turǵyndary túıneme juqtyrǵan aýyl karantınge jabyldy

TARAZ. QazAqparat - Jambyl oblysynyń Talas aýdanyndaǵy Tamdy aýyly 15 kúndik karantınge jabyldy. Sebebi aýylda turǵyndardan sibir jarasy tabylǵan, dep habarlaıdy QazAqparat tilshisi.

Jalpy, Tamdy aýyldyq okrýginde 1 806 bas múıizdi iri qara, 29 053 bas ýaq mal, 887 bas jylqy tirkelgen.

Búginde eldi mekenge tórt túlikti kirgizip, shyǵarýǵa, et pen sút ónimderin tasymaldaýǵa qatań tyıym salynǵan.

Oblystyq sanıtarlyq-epıdemıologııalyq baqylaý departamentiniń bergen málimetterine súıensek, túıneme tabylǵan aýyldaǵy úsh úıdiń 35 adamy tekserýden ótken.

Búginde vırýs juqtyrǵan 50, 55 jáne 59 jastaǵy úsh azamat aýdandyq aýrýhanada jatyr.

Aıtýynsha, olar aýrýdy sıyr soıý kezinde juqtyrǵan.

«Qazirgi tańda bir naýqas qanaǵattanarlyq jaǵdaıda aýrýhanadan shyǵaryldy. Úsh naýqas em sharalaryn jalǵastyryp jatyr. Naýqastar maldy veterınarlyq ruqsatsyz soıǵany anyqtaldy. Taǵy bir jaǵdaıda ınfektsııa kózi áli de anyqtalyp jatyr. Osy jaǵdaıǵa baılanysty ishki ister organdary tekserý jumystaryn júrgizip jatyr», – dedi Jambyl oblystyq sanıtarlyq-epıdemıologııalyq baqylaý departamenti basshysynyń orynbasary Neılı Múlikova.

Aýrý oshaǵy anyqtalǵan úılerden barlyǵy 21 synama alynyp, soıylǵan sıyr eti arnaıy ólekse órteıtin temir peshte órtelgen.

Mal soıǵan aýla tolyq zalalsyzdandyrylǵan.

«Tamdy aýylynyń turǵyndary buqa súzip, jaraqat alǵan sıyrdy soıyp alǵan. Aýrý sonyń etinen juǵyp otyr. Daýryǵatyndaı eshteńe joq. Bizdiń óńirde 100 jyldan beri saqtalyp kele jatqan 189 sibir jarasynyń oshaǵy bar. Olardyń bári baqylaýymyzda. Jylyna 2 ret synamalar alynyp, zerthanaǵa ótkiziledi», – dedi Jambyl oblystyq veterınarııa basqarmasynyń basshysy Nurjas Qurmantaev.

Buǵan deıin Jambyl oblysynyń 421 turǵynyn kene shaqqanyn habarlaǵan bolatynbyz.