Jambyl oblysynda «Taraz HUB» IT-ortalyǵy ashyldy
Buǵan deıin dál mundaı ortalyq Astana («Astana hub») qalasynda ǵana jumys istep kelgen desek, ekinshi bolyp Taraz qalasynda ashylyp otyr.
«Taraz Hub»-tyń negizgi mıssııasy - ІT-mamandardyń jańa býynyn daıarlaý, startap-mádenıetin damytý jáne el men oblys ekonomıkasyn nyǵaıtý úshin joǵary tehnologııalyq jobalardy qurý. Jobanyń jalpy quny 250 mıllıon teńgeni quraıdy. Joba aıasynda 15 jańa jumys oryndary ashylady dep kútilýde. Sondaı-aq, onda 50 jumys orny bar 15 startap kompanııany ornalastyrýǵa jaǵdaı jasalǵan.
Asqar Isabekuly «Taraz Hub» Jambyl oblysynyń ІT-ındýstrııasy damýynyń ózegi jáne lokomotıvi bolýy tıis ekendigin atap ótti. Óńirde osyndaı ortalyqty qurý týraly sheshim bilikti mamandarǵa degen suranystyń ósýine negiz bolatyny sózsiz. Ortalyq dırektory Nursultan Temirhannyń aıtýynsha «Taraz Hub» aldaǵy ýaqytta barlyq jastaǵy adamdardy IT salasyndaǵy jańa tehnologııalarǵa, shaǵyn jáne orta bızneske qoldaý kórsetýge úıretetpek. Oqytýshylardyń biliktiligin arttyrý, joǵary oqý ornynan keıingi bilim berý jumystary da júrgiziletin bolady. Kovorkıng aımaǵynda zań jáne býhgalterlik salalary boıynsha jumys oryndary usynylmaq. Bıznes ınkýbatorda túrli sheberlik saǵattary, bıznes trenıngter ótedi.
- Qazirgi tańda ortalyqta elimizdegi eń bilikti ІT mamandar jumys jasaýda. Osy baǵyttaǵy úzdik kompanııalarmen baılanys ornatýdamyz. Buǵan deıin 13 kompanııamen kelisim jasalsa, taǵy 30-ǵa jýyq kompanııamen kelissózder júrgizip jatyrmyz. Aqparattyq tehnologııa boıynsha jumys jasaıtyn olardyń sanyn 80-ge deıin jetkizýge múmkindik bar. Ortalyqtaǵy mamandar balamaly energııa kózderin óndirýge arnalǵan qondyrǵylar, robot qurastyrýda tyń jetistikterge jetý jolynda eńbektenýde. Aldaǵy ýaqytta «Taraz Hub»-ty respýblıka boıynsha úzdik ortalyqqa aınaldyrýdy josparlap otyrmyz,- deıdi ortalyq basshysy Nursultan Temirhan.
Aıta ketý kerek, búginde ortalyq «Enactos Dulati» kompanııasynyń jańa otyn túrin oılap tabý jobasyn qoldaýda. Ol otyn kóń jáne ózge de qaldyqtardan quralady. Qýaty kómirmen deńgeıles jańa otynnyń quny kómir baǵasynan 8 ese tómen. Qazirdiń ózinde ony Jambyl aýdany Órnek aýylyndaǵy birqatar turǵyndar úılerin jylytý úshin kómirdiń ornyna paıdalanýda.
Ǵıbrat Sembaı