Jambyl oblysynda sý basqan aımaqty arshýmen 40 adam aınalysty
Osyǵan deıin habarlanǵanyndaı, Qostóbe aýylyna jaqyn mańda ózen jaǵalaýyn sý shaıyp ketip, biraz úılerdi sý basýyna baılanysty Baızaq aýdanynda jergilikti deńgeıde tótenshe jaǵdaı jarııalandy. Kúni boıy jergilikti atqarýshy organdardyń (30 adam men 9 tehnıka) jáne Baızaq aýdandyq órt sóndirý bóliminiń (9 adam men 1 tehnıka) ózenniń jaǵalaýyn nyǵaıtyp, sý arnasyn tazalaý jumystary júrgizildi.
«Sýdyń arnasynan asyp ketýine Kırov sý qoımasynan sýdyń jiberilýi sebep bolǵan. Talas ózeninen ol jerden 86,5 tekshe metr sý jiberilip, sonyń saldarynan ózen jaǵalaýynyń 40 metr jerin sý alyp ketti. Qostóbe aýylynda jeke kásipkerdiń jylyjaıyn sý basyp qaldy. Sonymen qatar eki kóshede 34 turǵyn úıdiń aldyna 5-10 sm bıiktikte sý jınaldy. 4 adamy men 1 tehnıkasy bar qutqarý qyzmetiniń ókilderi sý basqan úılerdiń aımaqtaryn tazartý jumystarymen aınalysty. 72 tekshe metr sý aǵyzyp jiberildi. Osy ýaqytta sýdy sorǵyzý jumystary aıaqtaldy. Osyǵan qaraı úılerdi sý basý qaýipi de birshama seıildi»,-dedi Oblystyq TJD baspasóz qyzmeti.
Turǵyndar arasynda zardap shekken adamdar joq, mal da aman. Osy ýaqytta Baızaq aýdany ákiminiń basshylyǵymen arnaıy komıssııa jumys istep jatyr.
Aýdan ákiminiń baspasóz qyzmetiniń habarlaýynsha, búgin tótenshe jaǵdaı oryn alǵan aımaqty oblys ákimi Kárim Kókirekbaev kelip kórip ketti. Óńir basshysynyń tapsyrmasymen jaǵalaýdan sý ketý qaýipi tónip turǵan aımaqtardy nyǵaıtý úshin 15 aýyr tehnıka men 40 adam jumyldyryldy.
«Búgingi tańda Talas ózeninde eshqandaı qaýip joq. Tótenshe jaǵdaılar qyzmetiniń kúshimen qalpyna keltirý jumystary júrip jatyr. Jaǵdaı baqylaýda», -dedi oblys ákimi.