Jambyl oblysynda Sherhan Murtazanyń ádebı-memorıaldyq mýzeı-úıi ashyldy
Sherhan Murtaza Jýaly aýdany Talapty aýylynda dúnıege kelgen. Týǵan aýylymen baılanysyn eshqashan úzbegen. Jazýshy alǵashqy shyǵarmalaryn, onyń ishinde áıgili «Aı men Aısha» ómirbaıandyq romanyn týǵan jeri Jýaly aýdany men onyń erekshe tabıǵatyna arnaǵan.
Óńir ákimdiginiń málimetine sáıkes, mýzeıge jazýshyǵa tıesili turmystyq zattar, onyń qujattary, dıplomdary, marapattary, medaldary, otbasymen jáne dostarymen birge túsken fotosýretteri qoıylǵan. Halyq jazýshysynyń aýyldastary, zııaly qaýym ókilderi, ǵalymdar, memleket jáne qoǵam qaıratkerleri Sherhan Murtazanyń kabınetin, kitaphanasyn dál sol qalpynda kórip, tamashalady.
Ǵımarattyń úshinshi qabatynda bılıard zaly bar. Sherhan Murtaza bir kezderi tek qarymdy qalamger ǵana emes, bılıard oıynyń sheberi retinde de ózin kórsete bilgen.
Sondaı-aq Talapty aýylynda halyq jazýshysynyń 90 jyldyǵyna arnalǵan saltanatty shara ótti.
«Sherhan Murtaza shyndyqtyń shyraqshysy bola bilgen alyp tulǵa. Qyzmetin baspa redaktorlyǵynan bastap, uzaq jyldar respýblıkalyq buqaralyq aqparat quraldarynyń basshysy, Parlament Májilisiniń depýtaty retinde qalamgerlik pen qaıratkerlikti qatar alyp júrdi.
Onyń elge bergeni, aıtqany, kórsetken úlgisi, siltegen joly ushan-teńiz. Kózi tirisinde baspasózdiń bahadúri, qara sózdiń zergeri, shyndyqtyń shyraqshysy atandy», – dedi Jambyl oblysynyń ákimi Nurjan Nurjigitov.
Sondaı-aq, QR Aqparat jáne qoǵamdyq damý mınıstri Darhan Qydyráli, Qazaqstannyń Eri Muhtar Shahanov, Halyq qaharmany Baqytjan Ertaev, akademık, memlekettik syılyqtyń laýreaty Sábden Orazaly, «Qazaqstan dáýiri» gazetiniń bas redaktory Sáýle Meshitbaıqyzy da oılaryn ortaǵa salyp, jazýshynyń tulǵalyq bolmysy týraly áńgimeledi.
Shara barysynda jazýshylar arasyndaǵy «Aqıqattyń aq týy» baıqaýy men «Shynnyń júzi – Sheraǵa» respýblıkalyq aqyndar múshaırasynyń jeńimpazdaryn saltanatty túrde marapattaý rásimi ótti.
Eske salaıyq, Prezıdent Qasym-Jomart Toqaev Sherhan Murtazanyń 90 jyldyǵyna oraı Tarazda ótip jatqan mereıtoılyq is-sharaǵa arnaıy quttyqtaý hat joldaǵan bolatyn. Keshe Taraz qalasynda Sherhan Murtazaǵa arnap eskertkish qoıylǵan edi.