Jambyl oblysynda salmaǵy 500 keli bolatyn áýe bombasy tabyldy

TARAZ. QazAqparat – Jambyl oblysynyń quqyq qorǵaý organdary Taraz mańyndaǵy qumdy aımaqqa qaýipti áýe bombasynyń qalaı kelgenin anyqtap jatyr, dep habarlaıdy QazAqparat tilshisi.

Jambyl oblysy polıtsııa departamentiniń áleýmettik jelidegi resmı paraqshasyna Baızaq aýdanynyń turǵynynan qumnan tabylǵan kúdikti zat týraly habarlama kelip túsken.

Departamenttiń baspasóz qyzmeti habarlamaǵa dereý jaýap berip, ony Baızaq aýdandyq polıtsııa bólimindegi áriptesterine tapsyrdy.

«Polıtsııa qyzmetkerleri oqıǵa ornyna kelip, avıatsııalyq snarıadqa uqsas zat tapqan. Sodan keıin oqıǵa ornyna polıtsııa departamentiniń saperleri, TJ departamentiniń órt sóndirýshileri men qutqarýshylary shaqyryldy», - dep habarlady oblystyq polıtsııa departamenti.

Oqıǵa ornyna kelgen saperler snarıadty zerttep, onyń 1962 jyly shyǵarylǵan «FAB 500m-62» avıatsııalyq bombasy ekenin aıtty.

Onyń salmaǵy - 500 keli, uzyndyǵy 2,5 metrge jetedi, ol kez kelgen mınýtta 200 metrge deıin jaryla alady.

Bombany odan ári zalalsyzdandyrý úshin arnaıy áskerı tehnıkaǵa tıep, polıgonǵa alyp ketti.

«Polıtsııaǵa qaýipti bomba týraly habarlaǵan er adamdy marapattaý týraly usynys jasaldy», - deıdi polıtsııa departamenti.