Jambyl oblysynda órt jaǵdaılary 35 paıyzǵa kóbeıdi

TARAZ. QazAqparat – Jambyl oblysynda órt oqıǵalary ótken jylǵa qaraǵanda 35 paıyzǵa artqan. Órttiń basym bóligi Shý men Jambyl aýdandarynda boldy, dep habarlaıdy QazAqparat tilshisi.

Jambyl oblystyq Tótenshe jaǵdaılar departamenti baspasóz qyzmeti taratqan málimetke súıensek, órt jaǵdaılarynyń deni elektr tehnıkalarynyń kúıip ketýinen bolǵan. Sondaı-aq bıyl shilde aıyna deıin 460 adam órtten qutqarylyp, alǵashqy medıtsınalyq kómek kórsetilgen. Al 8 adam jaraqat alyp, 11 adam qaza tapqan.

Aıta keteıik, aımaqta jalpy sany 25 órt sóndirý beketi bar. Munda kún saıyn 130 qutqarýshy men 30 avtokólik jumys isteıdi.

Buǵan deıin Jambyl oblysynda bir táýlikte órttiń birneshe deregi tirkelgenin

jazǵan bolatynbyz. T.Rysqulov aýdany Aqyrtóbe aýylyndaǵy turǵyn úıdiń aýlasynda shóp qorany jalyn sharpydy. Otty aýyzdyqtaýǵa 5 órt sóndirýshi-qutqarýshy men 2 tehnıka jumyldyrylyp, tilsiz jaý 2 saǵattan astam ýaqytta tolyǵymen sóndirilgen. 100 sharshy metr aýmaqqa jaıylǵan órttiń saldarynan shóphana men ondaǵy 150 túk shóp janyp ketken.

Sondaı-aq, Jambyl oblysynda demalys aımaǵy órtenip jatqanyn jazǵan bolatynbyz. Merki aýdanynyń Merki aýylynan 14 shaqyrym qashyqtyqta ornalasqan «Turan» demalys aımaǵy órtke orandy.