Jambyl oblysynda oqýshylar 100% saýyqtyrý, demalys sharalarymen qamtylmaq

TARAZ. QazAqparat – Bıyl Jambyl oblysynda oqýshylardy jazǵy maýsymda saýyqtyrýmen jáne túrli demalys sharalarymen 100 paıyz qamtý josparlanyp otyr, dep habarlaıdy QazAqparat tilshisi.

Jambyl oblysy boıynsha qala syrtynda 11 saýyqtyrý lageri bar. Onyń tórteýi memlekettik, ekeýi senimgerlikke berilgen, al beseýi jekemenshik lagerler.

Oblystyq Bilim basqarmasynyń basshysy Meıirhan Ómirbektiń aıtýynsha, óńirde 1-10 synyptaǵy 201 046 oqýshy, ıaǵnı 100 paıyzy saýyqtyrý, demalys sharalarymen qamtylady.

«Onyń ishinde 75 paıyzyn, ıaǵnı 174 754 oqýshyny jazǵy saýyqtyrý jáne demalyspen, 25 paıyzyn nemese 26 292 oqýshyny demalys sharalarymen qamtý josparda bar.

Osy maqsatta kópbalaly, az qamtamasyz etilgen otbasynda tárbıelenetin balalardyń jazǵy saýyqtyrý demalysyna jergilikti bıýdjetten 434,9 mıllıon teńge bólingen. Onyń 285,2 mıllıon teńgesi 6580 balany qala syrtyndaǵy lagerge jiberýge, 149,7 mıllıon teńgesi 33 277 oqýshyny mektep janyndaǵy saýyqtyrý sharalarymen qamtýǵa qarastyrylǵan.

Budan bólek, qala syrtyndaǵy 4 memlekettik lagerdiń aǵymdaǵy daıyndyq jumystaryna 4 mıllıon teńge bólindi.

Jalpy, bıylǵy jyldyń ereksheligi – balalardy demalyspen ári saýyqtyrýmen qamtıtyn jyl boıyna jumys isteıtin oqý-saýyqtyrý ortalyǵyn ashý boıynsha daıyndyq jumystary júrgizilip jatyr, – dedi Meıirhan Ómirbek.

Al Taraz qalalyq bilim bóliminiń bergen málimetterine súıensek, oblys ortalyǵyndaǵy 20 792 bala mektep janyndaǵy jáne qala syrtyndaǵy saýyqtyrý lagerlerinde demalady.

Aıta keteıik, sońǵy úsh jylda oqýshylar pandemııalyq shekteýlerge baılanysty demalys oryndaryna bara alǵan joq.