Jambyl oblysynda qylmystyq top 80 mln teńgege tyńaıtqysh urlaǵan

TARAZ. QazAqparat –Jambyl oblysynda vagondardan 80 mln teńgege ammofos tyńaıtqyshyn urlap kelgen qylmystyq top quryqtaldy, dep habarlaıdy QazAqparat Rolisia.kz-ke silteme jasap.

Naýryz-shilde aılary aralyǵynda belgisiz adamdar Shaıqoryq temirjol stantsııasyndaǵy jyljymaly vagondardan alys, jaqyn shetelderge jáne Qazaqstannyń basqa óńirlerine eksporttalatyn «Qazfosfat» JShS óndirgen ammofos tyńaıtqyshyn birneshe ret urlaǵan. Keltirilgen zalal 80 mıllıon teńgeden asady. QR Qylmystyq kodeksiniń 188-baby 3-bóligi boıynsha sotqa deıingi tergeý amaldary bastaldy

, - delingen aqparatta.

Málim etilgendeı, is-sharalar keshenin júrgizý barysynda Taraz stantsııasyndaǵy jelilik polıtsııa bóliminiń qyzmetkerleri «Qazfosfat» jaýapkershiligi shekteýli seriktestiginiń Qaýipsizdik departamenti qyzmetkerlerimen birlesip, shildeniń 22-sinen 23-ine qaraǵan túni Shaıqoryq stantsııasynda qylmystyq topty quryqtaǵan. Eki Gazel kóligimen vagondardan urlyq jasaý kezinde oblystyń 8 turǵyny ustalǵan.

Olardan 5 tonna 700 keli ammofos, 2 kólik quraly jáne sharýashylyq zattary tárkilendi. Kinálaryn moıyndady. Ustalǵandardyń basqa qylmystarǵa qatystylyǵyn anyqtaý úshin barlyq qajetti jedel-tergeý is-sharalary júrgizilip jatyr

, - delingen polıtsııa habarlamasynda.