Jambyl oblysynda qurylys nysandaryna 22 mln teńge aıyppul salyndy

TARAZ. QazAqparat - Jambyl oblysynda jyl basynan beri 47 qurylys nysanyna jospardan tys tekserý jumystary júrgizilip, 22 mıllıon 770 myń teńgege ákimshilik aıyppul salyndy, dep habarlaıdy QazAqparat tilshisi.

Bul týraly óńirlik kommýnıkatsııa qyzmeti alańynda ótken brıfıngte Jambyl oblystyq memlekettik sáýlet-qurylys baqylaý basqarmasynyń basshysy Qaırat Bısembaev aıtty.

«Bıyl 47 qurylys obektisine jospardan tys tekserý júrgizilip, 79 ákimshilik is qozǵalyp, 22 mıllıon 770 myń teńge ákimshilik aıyppul salyndy. 50 tapsyrys berýshi, 18 merdiger mekeme, 1 jobalaýshy, 7 tehnıkalyq qadaǵalaýshy, nátıjesinde 28 nusqama berildi. Al byltyr 26 qurylys nysanyna tekserý júrgizilip, 36 ákimshilik is qozǵalyp, 8 mıllıon 879 myń teńge kóleminde ákimshilik aıyppul salynǵan bolatyn.

Basqarmamen Jýaly aýdany Qaırat aýylyndaǵy 149 oryndyq mádenıet úıiniń qurylysyna tekserý júrgizilip, nysannyń bas merdigeri «ErK Astana» JShS-ne ákimshilik is qozǵalyp, sot sheshimimen 1 380 000 teńge ákimshilik aıyppul salynyp, lıtsenzııasynan aıyryldy.

Sonymen qatar, 4 tehnıkalyq qadaǵalaýshynyń attestattary 6 aı merzimge toqtatyldy», – dedi basqarma basshysy.

Buǵan deıin «TARAZ» fýtbol klýbynda 610 mıllıon teńge maqsatsyz jumsalǵanyn jazǵan bolatynbyz.