Jambyl oblysynda qurama jem shyǵaratyn zaýyt ashyldy

TARAZ. QazAqparat - Halyqaralyq «ZHEIF-2023» forýmy aıasynda Baızaq aýdanynda «Alel Agro» AQ qus fermasyna qarasty qurama jem shyǵarý zaýytynyń iske qosylý rásimi ótti, dep habarlaıdy QazAqparat tilshisi.

Byltyr qurylǵan zaýyttyń jalpy quny 4,4 mıllıard teńgeni quraıdy. Zaýyt jylyna 96 myń tonna jem óndirýge qaýqarly.

Kásiporynnyń ashylý saltanatyna Jambyl oblysynyń ákimi Nurjan Nurjigitov, QR Aýyl sharýashylyǵy vıtse-mınıstri Ábilhaıyr Tamabek, Qyrǵyz Respýblıkasy Talas oblysynyń gýbernatory Nurlan Darynov, «Alel Agro» aktsıonerlik qoǵamynyń bas dırektory Erik Ahmetbekuly jáne aýyl sharýashylyǵy salasynyń ardageri Amangeldi Karentaev qatysyp, óz lebizderin bildirdi.

«Qazirgi tańda oblystyń aýyl sharýashylyǵy salasynda birqatar sheteldik kompanııalarmen birlesken jobalar júzege asyrylyp jatyr. Aımaqta egin egip, mal ósirýmen qatar, qus sharýashylyǵyn damytýdyń da múmkinshiligi joǵary. Osy oraıda, qus eti ónimin arttyrý jáne baǵasynyń qoljetimdi bolýyn qamtamasyz etý úshin búgingi ashylyp otyrǵan «Alel Agro» aktsıonerlik qoǵamynyń qus fabrıkasyna qarasty jem óndiretin zaýyttyń bolashaǵy zor desek, qatelespeımiz.

Jalpy, oblysta 2019-2021 jyldary 4 iri qus fermasymen 15,4 myń tonna qus eti óndirilip, 2022 jyly qosymsha «Alel Agro» aktsıonerlik qoǵamynyń qus fabrıkasy quryldy. Aldaǵy jyldary da bul baǵyttaǵy jumystar jalǵasyp, kásiporyndar ashý kózdelgen. 2026 jylǵa qaraı qus etin óndirý kólemin 15,4 myń tonnadan 70 myń tonnaǵa deıin arttyrý josparlanyp otyr. Osylaısha óz-ózimizdi qus etimen qamtý máselelesi sheshiledi dep kútilýde», – dedi oblys ákimi Nurjan Nurjigitov.

Aıta keteıik, buǵan deıin Qordaıda jylyna 1,2 mln tonna tsement óndiretin zaýyttyń qurylysy bastaldy, dep habarlaǵan bolatynbyz.