Jambyl oblysynda qýaty 1 GVt aýqymdy jel elektr stansasy salynady

NUR-SULTAN. QazAqparat - Energetıka mınıstrliginde qýaty 1 GVt jańartylatyn energııa kóziniń aýqymdy jobasyn iske asyrýǵa baǵyttalǵan qaǵıdattar týraly kelisim jasaldy, dep habarlaıdy QazAqparat.

BúginEnergetıka mınıstrligi, «Samuryq-Qazyna» AQ, «QazMunaıGaz» UK AQ jáne «TotalEnergies» KT Memleket basshysy Qasym-Jomart Toqaevtyń 2021 jylǵy 26 mamyrdaǵy Qazaqstannyń elektr energetıkasy salasyn damytý máseleleri jónindegi keńes barysynda bergen tapsyrmasyn oryndaý sheńberinde qýaty 1 GVt JEK iri aýqymdy jobasyn iske asyrýǵa baǵyttalǵan qaǵıdattar týraly kelisim jasasty.

Qol qoıý rásimine QR Energetıka mınıstri Bolat Aqsholaqov, «Samuryq-Qazyna» AQ Basqarma tóraǵasy Almasadam Sátqalıev, «QazMunaıGaz» UK AQ Basqarma tóraǵasy Maǵzum Myrzaǵalıev, Azııada bıznesti damytý boıynsha «Total Eren S.A.» vıtse-prezıdenti Antýan Gare, Qazaqstandaǵy «TotalEnergies» Bas dırektory Ahlem Frıga-Noı qatysty.

Qol qoıylǵan qujat energııany jınaqtaý júıesin paıdalana otyryp, jalpy qýaty 1 gıgavatt jel elektr stansalaryn damytýǵa, qarjylandyrýǵa, salýǵa jáne paıdalanýǵa baǵyttalǵan.

Obekti Jambyl oblysyndaǵy Mırnyı aýyly mańynda ornalasady.

Jobanyń qurylysyn kezeń-kezeńimen júrgizý josparlanyp otyr jáne joba 2024 jyldan bastap 2026 jyldy qosa alǵan kezeńde tolyq aıaqtalady dep josparlanǵan.

Atalǵan jobany iske asyrý Qazaqstannyń «jasyl» ekonomıkaǵa kóshý tujyrymdamasymen bekitilgen nysanaly ındıkatorlarǵa qol jetkizýge, qosymsha ınvestıtsııalar tartýǵa, jańa jumys oryndaryn qurýǵa, sondaı-aq «jasyl» elektr energııasyn generatsııalaýdy ulǵaıtýǵa múmkindik beredi.