Jambyl oblysynda kóktemgi egis jumystary 80 paıyzǵa aıaqtaldy – Erbol Qarashókeev

TARAZ. QazAqparat - Aýyl sharýashylyǵy mınıstri Erbol Qarashókeev jumys saparymen Jambyl oblysyna keldi. Mınıstr shalǵaı aýdandarǵa baryp, qyzylsha ósirýshiler qaýymdastyǵynyń múshelerimen kezdesti jáne ırrıgatsııalyq júıelerdiń jobalarymen, kóktemgi egis jumysynyń barysymen tanysty, dep habarlaıdy QazAqparat.

Sapar baǵdarlamasy aıasynda vedomstvo basshysy Shý aýdanyna baryp, jańa qant zaýytynyń qurylysyn qarap, jumysshylarmen kezdesti.

Mınıstr budan ári jańbyrlatatyn jáne tamshylatatyn júıelerdi zerdelep, sýarmaly eginshiliktiń tıimdiligin arttyrý perspektıvalary sýdy únemdeıtin sýarý tehnologııalaryn keńinen qoldanýmen tyǵyz baılanysty ekenin, bul sýdy tutynýdy azaıtýǵa jáne sýdy dáldep berý, qorektik zattarmen qamtamasyz etý arqyly egin ónimdiligin arttyrýǵa múmkindik beretinin atap ótti.

«Memlekettik qoldaý sharalarynyń arqasynda sý únemdeý tehnologııalary qoldanylatyn sýarmaly jerlerdiń kólemi ulǵaıdy. Agroónerkásiptik keshendi damytýdyń ulttyq jobasy aıasynda olardyń aýmaǵyn 450 myń gektarǵa deıin ulǵaıtý josparlanyp otyr», - dedi Erbol Qarashókeev.

Qordaı aýdanynda vedomstvo basshysy «GreenWill» jylyjaı keshenimen tanysyp, biregeı akvaponıkalyq jylyjaıdy aralady.

Mınıstrge akvaponıka ádisi bir ýaqytta balyq ósirýge jáne qorektik eritindilerde topyraqsyz ósimdikter ósirýge negizdelgeni týraly habarlady.

Tyńaıtqysh retinde ósimdikterge organıkalyq erıtin tyńaıtqyshty sıntezdeýdiń tabıǵı bakterııalyq protsesi qoldanylady, ıaǵnı, bul tolyǵymen tabıǵı protsess.

Vedomstvo basshysy kóktemgi dala jumystarynyń barysyn baqylap, Memleket basshysynyń 2022 jylǵy 16 naýryzdaǵy «Jańa Qazaqstan: jańarý men jańǵyrý joly» atty Qazaqstan halqyna Joldaýynda kóktemgi dala jumystaryn sapaly júrgizýge jáne fermerlerdi qajetti quraldarmen qamtamasyz etýge erekshe nazar aýdarǵanyn atap ótti.

Egis alqaptaryn aralaý barysynda, vedomstvo basshysy oblystaǵy kóktemgi dala jumystarynyń qarqynyna, topyraqtyń ylǵaldanýynyń jaqsy deńgeıin atap ótti.

Óńirde tuqym, arzandatylǵan dızel otyny, tyńaıtqysh jáne basqa da egis egý úshin qajetti quraldar jetkilikti.

Búgingi tańda oblysta kóktemgi egis jumystary 80 paıyzǵa oryndalǵan.

Odan ári E.Qarashókeev qant qyzylshasyn óńdeıtin Merki qant zaýytyna baryp, óndiristi iske qosýǵa daıyndyǵyn tekserip, shyǵarylatyn ónimniń ımportty almastyrýǵa qol jetkizý úshin mańyzdylyǵyn atap ótti.

Jambyl oblysynyń qyzylsha ósirýshilerimen kezdesýde qatysýshylar salany damytý máseleleri men problemalyq máselelerdi talqylady.

Erbol Qarashókeev salany qoldaýdyń memleket qabyldap jatqan sharalary týraly aıtyp berdi.

Vedomstvo basshysynyń aıtýynsha, aýyl sharýashylyǵy taýaryn óndirýshilerge tuqym, tyńaıtqysh jáne gerbıtsıd, tehnıka satyp alýǵa ketken shyǵyndardy óteý, ınvestıtsııalyq sýbsıdııalar, aınalym qarajatyn tolyqtyrýǵa jeńildetilgen nesıe berý qarastyrylǵan.

Mınıstr, sondaı-aq tyńaıtqyshtardyń qunyn tómendetý boıynsha jumystar júrgizilip jatqanyn habarlady.

Onyń aıtýynsha, mınıstrlik ammıak selıtrasynyń baǵasyn tómendetti, «Qazfosfat» JShS-men ammofos baǵasyn tómendetý týraly kelissózder júrgizilýde.

Óz kezeginde, qyzylsha ósirýshiler óndiris quraldaryna baǵanyń ósýine, sýbsıdııalaý, sýmen jabdyqtaý jáne jer paıdalaný júıesiniń erejelerin ózgertýge qatysty birqatar suraqtar qoıdy.

Keńes qorytyndysy boıynsha, vedomstvo basshysy Jambyl oblysy qyzylsha ósirýshiler qaýymdastyǵynyń ókilderin sýbsıdııalaý júıesin reformalaý jónindegi jumys tobyna qosýdy tapsyrdy.

Erbol Qarashókeev jumys saparynyń birinshi kúninde mal sharýashylyǵymen, atap aıtqanda, asyl tuqymdy jylqy sharýashylyǵymen, qymyz óndirýmen aınalysatyn «Ar-As» ShQ jumysymen tanysty.

Búgin mınıstrdiń jumys sapary jalǵasady. Baǵdarlama boıynsha Jambyl aýdanyndaǵy kóktemgi dala jumystarynyń barysyn tekserý, jaıylymdyq jerlerdi tekserý, sondaı-aq oblystyń taýar óndirýshilerimen kezdesý josparlanǵan.