Jambyl oblysynda kóktemgi dala jumystary aıaqtalyp qaldy
Oblys ákimi Berdibek Saparbaevtyń tóraǵalyǵymen beıne-baılanys formatynda ótken basqosýda densaýlyq saqtaý basqarmasynyń basshysy Marat Jumanqulov aımaqtaǵy koronavırýs ınfektsııasynyń jaǵdaıy týraly baıandady.
Budan soń aýdandar men Taraz qalasynyń ákimderi «Jumyspen qamtýdyń jol kartasy» jobalaryn iske asyrý, kóktemgi dala jumystaryn oryndalýy jáne turǵyndarmen keri baılanysty uıymdastyrý týraly esep berdi.
Jalpy, oblystaǵy qoǵamdyq-saıası ahýal turaqty. Karantın rejıminiń jeńildetilýine baılanysty shaǵyn jáne orta bıznes óz jumystaryn jalǵastyra bastady. Aýdandarda aýyl sharýashylyǵy daqyldaryn egý aıaqtalýda, pılottyq joba aıasynda aýyl turǵyndarynyń kirisin arttyrý boıynsha júıeli jumystar júrgizilýde.
Búginde jergilikti atqarýshy organdar «Jumyspen qamtýdyń jol kartasy» memlekettik baǵdarlamasyn júzege asyrýda. Degenmen jumys qarqyny oıdaǵydaı emes. Máselen, Shý aýdanynda bar-joǵy úsh joba ǵana qolǵa alynǵan.
Bul baǵytta Qordaı aýdanynda jumystar qyzý atqarylýda. Qurylysy bastalǵan 124 joba boıynsha 12450 jumys orny qurylǵan. Al Baızaq aýdanynda 70 ýchaskede jóndeý-qurylys jumystary bastaldy desek, búgingi kúni munda 915 jumys orny ashylypty. Onyń jartysy aýdandyq jumyspen qamtý ortalyǵy arqyly joldama alǵan aýyl turǵyndary.
- Jumysty áý bastan durys júıege keltirý kerek. Jalpy, aımaqta 128 joba boıynsha jumys áli bastalmaǵan. Ýaqyt ótip jatyr. Jumysty tezdetip, birinshi jartyjyldyqta bólingen qarajattyń basym bóligin ıgerý qajet. Sonymen qatar, qurylys-jóndeý jumystarynyń sapasyn nazarda ustaǵan abzal, - dedi Berdibek Saparbaev.
Sondaı-aq, aımaq basshysy aýyl sharýashylyǵy daqyldarynyń egistik alqabyn keńeıtýge, eldi mekenderdi abattandyrýǵa jáne sanıtarlyq tazalaýǵa da aıryqsha nazar aýdardy. Bul turǵydaǵy sharalar turaqty túrde júrgizilýi kerektigine kóńil bólindi. Qalalar men aýdan ortalyqtary ǵana emes, barlyq eldi mekender taza bolýy tıis.