Jambyl oblysynda keler jyly úsh sý qoımasynyń qurylysy bastalady
«Qazsýshar» RMK Jambyl oblystyq fılıalynyń dırektory Qazybek Bedebaevtyń aıtýynsha, jańa gıdroqurylym 2024 jylǵa deıin paıdalanýǵa beriledi dep josparlanyp otyr. Qurylys júrgizý úshin Qarjy mınıstrligine bıýdjet ótinimi berilgen.
«Jambyl oblysynda sý tapshylyǵy talaı jyldan beri kún tártibinen túspeı keledi. Eger bul máseleni túbegeıli sheshý tek qarjyǵa ǵana baılanysty bolsa, sý tapshylyǵynan áldeqashan qutylar edik. Ókinishke qaraı óńir transshekaralyq ózenderdiń sýyn paıdalanatyn bolǵandyqtan munda kórshiles memleketke táýeldilik te bar. Dese de, osy máseleni sheshý úshin úsh sý qoımasyn salýdy josparlap otyrmyz . Tehnıkalyq-ekonomıkalyq negizdeme memlekettik saraptamanyń oń qorytyndysyn aldy. Endi salalyq mınıstrlik qajetti qarajatty bólse, qurylys jumystaryn bastaımyz»,- dedi Qazybek Bedebaev.
Aıta keteıik, qarjy máselesi sheshilse Qordaı aýdanynda syıymdylyǵy 15,222 mln tekshe metr bolatyn «Yrǵaıty» sý qoımasynyń irgetasy qalanbaq. Sondaı-aq dál osy aýdanda syıymdylyǵy 14,6 mln tekshe metrdi quraıtyn «Qalǵuty» sý qoımasy, Baızaq aýdanynda 11,107 mln tekshe metr sý sııatyn «Aqmola» sý qoımasy salynady.
«Bul nysandardyń jalpy quny 14,9 mlrd teńgege teń. Jańa sý qoımalary vegetatsııa kezinde kórshi memleketke aǵyn sýǵa táýeldilikti azaıtyp, oblys aýmaǵyndaǵy 34,5 myń gektar sýarmaly alqapty sýlandyrýǵa múmkindik beredi» -, dedi fılıal dırektory.
Búginde óńirde aýyl sharýashylyǵy daqyldary egilgen egistiktiń jalpy kólemi 200 myń gektardan asady. Al qaıta jańǵyrtý jumystary aıasynda tozyǵy jetken gıdrotehnıkalyq nysandar qaıta qalpyna keltiriledi. Oblystaǵy Baızaq, Jambyl, Jýaly, Qordaı jáne Merki aýdandaryndaǵy sý sharýashylyǵy nysandaryna «Eýropa qaıta qurý jáne damý banki» esebinen qaıta jańǵyrtý jumystary júrgizilip jatyr.
Búgingi tańda 31 joba boıynsha atalǵan jumystardyń merdigerleri anyqtalyp, qurylys jumystary qolǵa alynǵan .
Jańǵyrtý jumystarynyń jalpy quny 21,5 mlrd teńge. Jobanyń júzege asýymen 1 388 shaqyrym bolatyn 310 nysan kúrdeli jóndeýden ótedi. Mamyry aıyna deıin 87 shaqyrymǵa jýyq kanaldy betonmen qaptaý jáne 189 shaqyrymdaı kanalǵa mehanıkalyq tazalaý jumysy júrgizilgen.
Aıta ketsek, qaıta jańǵyrtý jumystary aıaqtalǵannan keıin óńirde 51,271 myń gektar sýarmaly alqap qaıta aınalymǵa enbek.