Jambyl oblysynda qańtarda ustalǵan kúdiktini polıtsııa azaptamaǵan - Bas prokýratýra

NUR-SULTAN. QazAqparat – Jambyl oblysynda azaptaý shaǵymdary boıynsha tekserý júrgizildi. Bul týraly Ortalyq kommýnıkatsııalar qyzmetinde QR Bas prokýratýrasy 1-qyzmet basshysynyń orynbasary Eldos Qılymjanov aıtty, dep habarlaıdy QazAqparat tilshisi.

«Tergeý barysynda azamattardyń quqyqtarynyń saqtalýyna jáne zańdylyqty qamtamasyz etýge erekshe nazar aýdarylyp otyr. Tergeýdiń ruqsat etilmegen ádisterin qoldaný faktileri boıynsha sotqa deıingi tergep-tekserý júrip jatyr. Tergeý nátıjesi keıbir aryz ıeleriniń azaptaý týraly shaǵymdy qorǵaný maqsatynda jáne oǵan qatysty dáleldemelerdi jol berilmeıtin dep taný úshin qoldanatynyn kórsetti. Mysaly, Jambyl oblysynda 5 qańtarda B. esimdi azamat bir top adammen birge memlekettik obektilerdi órtegen, odan keıin polıtsııa departamentinen Kalashnıkov avtomatyn, Makarov tapanshasyn, 2 ańshylyq qarýdy jáne 3 travmatıkalyq tapanshany jymqyrǵan», - dedi E. Qılymjanov.

Onyń aıtýynsha, kúdiktiniń bul qylmystarǵa qatysy bary beınekamera jazbalarymen, kýágerlerdiń jaýaby jáne istiń basqa da materıaldarymen rastalǵan.

«Ustalǵannan keıin odan polıtsııa qyzmetkerleri tarapynan azaptaý jasalǵany týraly aryz tústi. Bul fakti boıynsha Sybaılas jemqorlyqqa qarsy is-qımyl qyzmeti táýelsiz advokattyń qatysýymen tergeý júrgizdi. Ystanbul hattamasy sııaqty azaptaýlarǵa qarsy adam quqyqtaryn qorǵaý jónindegi halyqaralyq standarttarǵa sáıkes, psıhologııalyq-psıhıatrııalyq saraptama jasaldy. Mamandar jábirlenýshiniń psıhoemotsıonaldy jaǵdaıyn tolyq zerttedi, onyń nátıjesi boıynsha tergeý organdary tarapynan oǵan qandaı da bir psıhologııalyq qysym kórsetilmegeni jarııalandy. Nátıjesinde is qylmys quramynyń bolmaýyna baılanysty toqtatyldy», - dep túsindirdi Bas prokýratýra ókili.

Budan buryn habarlanǵandaı, Qańtar oqıǵasy boıynsha tergeý organdarynyń is júrgizýinde 5 041 qylmystyq is bar.