Jambyl oblysynda gofrlengen karton óndirý zaýyty ashyldy
Avtomattandyrylǵan qondyrǵylarmen jabdyqtalǵan kásiporyn jańa úlgidegi ozyq tehnologııalardy paıdalanatyn ınnovatsııalyq, energııa syıymdylyǵy joǵary óndiris orny. Quny 1,7 mıllıard teńgeni quraıtyn joba jylyna 12 myń tonnaǵa jýyq ónim óndirýge qaýqarly. 50-ge jýyq adamdy turaqty jumyspen qamtıdy.
«Biz osyndaı óndiris oshaqtaryn ashý boıynsha ınvestorlardy tarta otyryp, tıisti jumystardy jalǵastyratyn bolamyz. Bul joba aýdan jáne óńir ekonomıkasynyń damýyna oń áserin tıgizetinine senimdimin. Al, jergilikti atqarýshy organdar tarapynan óndiristiń úzdiksiz jumys isteýine jan-jaqty qoldaýlar kórsetiletin bolady», – dedi oblys ákimi Nurjan Nurjigitov.
«KazStoneBox» JShS basshysy Berik Úmitqalıevtiń aıtýynsha, mıneraldy shıkizattan jasalǵan qaptama shyǵaratyn bul kásiporynnyń postkeńestik elderde balamasy joq.
«Kásiporynnyń ózge óndiristerden aıyrmashylyǵy – shıkizatqa táýeldi bolmaıdy. Sondaı-aq, jyl saıyn shamamen 500 myń tal-daraqty kesýden qutqaryp, qaıtalama shıkizat pen makýlatýra jınaýdy qajet etpeıdi. Kaltsıı karbonatyn shıkizat retinde paıdalaný ekologııalyq jaǵynan taza jáne tıimdi bıznes joba», – dedi kásiporyn basshysy.
Aıta keteıik, buǵan deıin Qordaıda jylyna 1,2 mln tonna tsement óndiretin zaýyttyń qurylysy bastaldy, dep habarlaǵan bolatynbyz.